15 најдобри подароци што може да ги подарите на читател (а не се книги)

 

 

Сите знаеме дека најдобриот подарок за луѓето што сакаат да читаат е книгата – нема дилема околу тоа. Книга од омилениот автор, книгата за која сте знаеле дека одамна сака да ја има во својата домашна библиотека, комплет книги од омилениот жанр, посебно специјално издание на омилениот класик, ваучер за книги од омилената книжарница, месечна или годишна претплата за електронски или аудиокниги – ова несомнено се подароци што ќе го израдуваат секој книгољубец.

Сепак, покрај со книги, некогаш нашите сакани сакаме да ги израдуваме и со некој друг подарок што ќе оди „во придружба“ на книгата. Но што да биде тоа? Еве ги нашите идеи и предлози.

 

Бидејќи читањето неретко е придружено од пиење кафе или чај, нема подобар подарок за читател од шолја за кафе или чај. Може да биде со натпис за љубовта кон читањето книги, со цитат од некоја книга, со илустрација од корици на книги или што било што се поврзува со читање и со љубовта кон книгите.

 

Секако, луѓето што сакаат да читаат книги и да пијат кафе или чај, сакаат и убави подлошки за шолјите, за уживањето да биде комплетно, но и за добри фотографии на „Инстаграм“. Подлошките се секако уште една добра идеја за подарок.

 

За похрабрите секако дека може да одберете и некое парче од таканаречената „книжевна мода“, односно облека со книжевни мотиви и дезени. Тоа може да бидат маици, чорапи, марами, фустани, буквално на сè може да биде пресликана некоја книжевна тема.

 

Покрај облека, со книжевни дезени и мотиви може да најдете и прекрасни парчиња накит или приврзоци за клучеви, кои исто така се одлична идеја за подарок.

 

Оние што вистински уживаат да читаат ќе ценат и убави држачи за читање, на кои може да си ги стават книгите и целосно да се препуштат на задоволството од читањето.

 

Креативните разделници (букмаркери) се одлично надополнување на секоја книга, а ги има буквално секакви, во најразлични форми и димензии, од најразлични материјали и во сите можни бои.

 

Дневниците за евиденција на прочитани книги се сѐ почест избор на сите љубители на читањето и се одлична идеја за подарок, а од неодамна ги има и на нашиот пазар и на македонски јазик.

 

Секој што сака да чита ќе ви каже дека нема поубав начин за „транспорт“ на книгите од супер кул платнените торби. Ем се еколошки, ем се модерни, ем се практични.

 

А бидејќи читањето секогаш се поврзува со одмор и релаксација, тука се и преслатките перничиња со книжевни мисли и пораки, кои, освен што одлично се вклопуваат во домашниот декор, придонесуваат и за дополнителна удобност при читањето.

 

Во домашната атмосфера убаво ќе се вклопи и некоја ламба за маса, која исто така може да послужи при читањето. Ако успеете да најдете и некоја во форма на книга, на радоста ќе ѝ нема крај.

 

А за дополнителна релаксација може да подарите и некоја убава мирислива свеќа. Секоја ваква свеќа одлично би се вклопила при читањето, но ако истражувате доволно, можете да најдете и мирисливи свеќи со дезени поврзани со книги.

 

Ако сакате да бидете сосема иновативни и оригинални, може да нарачате да ви направат сложувалка со корицата од омилената книга на оној кого сакате да го израдувате со подарок. Верувајте, во истиот момент ќе му станете омилената личност.

 

Друга слична опција е постер со корица од омилената книга или со некоја позната книжевна реплика, кој совршено ќе одговара на ѕидот на секој книгољубец.

 

Повеќето љубители на читањето сакаат да си забележуваат некои мисли што им се јавуваат додека читаат или да си препишат некој цитат што им оставил впечаток, па затоа бележниците, нотесите и убавите пенкалца исто така секогаш се добар избор.

 

А за гурманите читатели може да одберете и изненадување како „книжевна храна“, односно торта во форма на книга, мафини со ликови на познати писатели, колачиња со цитати од книги, чоколади спакувани во корици од книги – изборот и овде е навистина голем.

 

Имате ли вие нешто со што би го надополниле нашиот список?

 

 

Бонус идеја: кутија за книги за љубители на Фредрик Бакман

Ова прекрасно пакување е наменето за сите вљубеници во пишаната магија на шведската сензација Фредрик Бакман и во неа може да го најдат својот дом сите негови пет преведени книги одеднаш. Бидете оригинални, подарете го некому овој прекрасен сет од книги.