7 најпопуларни книжевни предизвици на „Инстаграм“
Ако кликнете на хаштагот #bookstagram на мегапопуларната мрежа „Инстаграм“, ќе ви се отвори една цела палета од фотографии од книгољупци што преку овој хаштаг ги споделуваат љубовта кон читањето и своите читачки навики. Ако некој сака да чита и да фотографира, сигурно нема да може да одолее на можноста да биде дел од оваа прекрасна заедница на луѓе опкружени со книги. А знаете ли кој е еден од најпопуларните начини да се биде дел од сето ова во последно време? Фотопредизвиците!
Што најчесто претставува еден книжевен фотопредизвик на „Инстаграм“? Се тргнува од една листа на теми или идеи, обично по една за секој ден од траењето на предизвикот (најчесто се месечни, тримесечни или годишни – односно 30-дневни, 90-дневни или 365-дневни). Вашата задача како букстаграмџии е секој ден да објавувате по една фотографија од книга или книги што одговараат на темата или идејата на денот.
Па, ако сте расположени за ваков вид инстаграмување, ви ги претставуваме седумте најпопуларни книжевни предизвици што треба да ги прифати секој љубител на книги.
Проект 2020
Ова е предизвик за 2020 година што го започнаа од theunreadshelf.com, но секако дека може да важи за која било година, а и не мора да почнете во јануари, може предизвикот да трае од јуни 2020 до јуни 2021 година, на пример. Најважното е дека секој месец има определена тема, а креаторите на предизвикот организираат и месечни дискусии во врска со предизвикот на својот блог. Целата листа на предизвици за секој месец од предизвикот може да ја најдете тука.
20 во 20
Многу е едноставно. Предизвикот се состои од тоа да се прочитаат 20 книги во 2020 година, без ограничување во однос на роковите и бројот на страниците. Постои само еден услов: 10 да бидат фикција, а 10 нефикција. Фотографиите за овој предизвик треба да се споделуваат преку хаштагот #Read20in2020. Овој предизвик е достапен тука.
Читачкиот предизвик на Linz The Bookworm
Linz The Bookworm е еден од најактивните книжевни блогови во светот. Овој читачки предизвик опфаќа различни нивоа и различни категории на секое ниво. Има голем број опции, но со овој предизвик достапен тука дефинитивно ќе излезете од вашата комфорна зона.
52 книги во 52 недели
Ова е еден од најпопуларните и најпознати предизвици и е многу едноставен – целта е да се прочитаат 52 книги од 52 различни категории. Овој предизвик е достапен на многу места, а и категориите секој може да ги прави според сопствениот вкус. Фотографиите треба да се споделуваат преку хаштагот #52BooksIn52Weeks.
Месечен предизвик на наградени книги
Предизвикот трае цела година и во секој месец треба да се прочита по една книга што добила некаква книжевна награда. Целиот предизвик може да го најдете тука.
Годишните предизвици на „Гудридс“
Платформата „Гудридс“ дозволува секој сам да си го постави предизвикот за 2020 година. На почетокот на годината треба да го внесете бројот на книгите што сакате да ги прочитате до крајот на годината и да се потрудите да ја остварите оваа цел. Предизвикот на „Гудридс“ е популарен и на „Инстаграм“, каде што се објавуваат сите прочитани книги.
Летен книжевен предизвик на „Антолог“
Минатото лето и ние ве предизвикавме да ги преплавите друштвените мрежи со книги. Сè што требаше да направите беше кои било 10 последователни дена да објавувате по една фотографија на зададена тема користејќи ги хаштазите #10денакниги и #летенкнижевенпредизвик. Добивме одлични фотографии, а најдобрите беа и наградени. Ќе ни се придружите ли и ова лето?
Ова се само дел од најпопуларните и најопштите книжевни предизвици на „Инстаграм“, а ги има навистина премногу и сите се одличен начин да прочитате што повеќе книги и притоа да се дружите и да се забавувате. Секако, не заборавајте да ја фотографирате секоја книга и да ги користите најпопуларните книжевни хаштази како: #bookstagram #reading #booklover #bookworm #bookish #bookaddict #instabook #booksofinstagram #bookshelf #bookaholic #bookphotography #booklove #booksbooksbooks
А кој од предизвиците вам ви го привлече вниманието?
