Две први и едно трето место за „Антолог“ на годишните награди на МАИ

  /  Вести   /  Две први и едно трето место за „Антолог“ на годишните награди на МАИ

Две први и едно трето место за „Антолог“ на годишните награди на МАИ

 

 

На годишните награди на Македонската асоцијација на издавачи, кои се доделуваат за периодот помеѓу два саема, оваа година издавачката куќа „Антолог“ доби три признанија, и тоа две први и едно трето место.

Наградите што ги освои „Антолог“ се следните:

 

Прво место во категоријата „Признание за инвентивност“ за Книжарницата на тркала

Оваа награда се доделува за имплементација на иновативно решение, нова и уникатна практика во работењето или примена на напредна технологија.

Книжарницата на тркала на „Антолог“ секако дека е супериорно иновативно решение помеѓу двата саема, кое се одвојува од сè друго!

Станува збор за сосема нов и иновативен концепт, кој ги подигна на друго ниво достапноста на книгите и културата на купување книги. Во рамките на издавачката куќа „Антолог“, Книжарницата на тркала почна со работа на 17 март 2021 година на Плоштадот Македонија во Скопје и оттогаш ја менуваше локацијата низ целата држава, доближувајќи ги сите најактуелни наслови и автори дури и на најнеочекуваните места. Идејата на оваа нова книжарница, прва од ваков вид во земјата, е промоција на читањето и читачките навики и доближување на книгата до најоддалечените места во земјата, каде што нема многу книжарници и достапноста на книгите е ограничена.

Концептот Книжарница на тркала доживеа успех уште првите месеци од активирањето, комуникацијата со публиката буквално се интензивира. Имавме одлична соработка со читателите, кои и сами ни предлагаа места каде следно би требало да отпатува подвижната книжарница. Досега се посетени над 20 помали и поголеми средини со фантастични реакции на оваа мобилна книжарница, која освен продажба на книги врши огромна мисија на културна и книжевна промоција.

Книжарницата на тркала започна речиси истовремено со лансирањето на новиот проект „Europe is brave new wor(l)ds“ / „Храбри нови зборови, прекрасни нови светови“. Логото на проектот, наречено Зборче, стана заштитен знак и речиси второ име на самата мобилна книжарница. Проектот е поддржан од програмата Креативна Европа на Европската Унија.

 

Прво место во категоријата „Најдобра едиција“ за едицијата „Громови“

Основен критериум кај оваа категорија е уредничкиот пристап и унифицираноста на едицијата, но и естетиката. Наградите се доделуваат врз основа на целиот уреднички концепт на едицијата.

Едицијата „Громови“ е многу значајна едиција во која се опфатени нефикциски дела – есеи, стручни и научни студии, дела од областа на публицистиката и слично од домашни и странски автори. Во оваа едиција свое место наоѓаат филозофско-есеистичките книги на авторите како Славој Жижек и Дубравка Угрешиќ, историските хроники на нобеловката Светлана Алексиевич, научните книги како „Narro ergo sum“ на Владимир Мартиновски, потресните сведоштва на Надија Мурад и сл. Изминатата година едицијата беше збогатена со реобјавување на култните дела на Јасна Котеска, „Санитарна енигма“ и „Комунистичка интима“; со прв македонски превод на култни книги како „Пропаганда“ од Едвард Бернејс и „Остров“ од Дмитриј Орехов; единствената книга целосно напишана во Аушвиц од Еди де Винд; како и лингвистички изданија од типот на „Имињата во македонската фразеологија“ како еден вид придонес кон јазичната мисла во годината кога славиме 100 години од раѓањето на Блаже Конески.

 

Трето место во категоријата „Најкреативно издание“ за книгата за деца „Уципуци размислува надвор од кутијата“ од латвиската авторка Зане Зуста

Во оваа категорија влегуваат оригиналните детски интерактивни книги, боенки за возрасни, како и други нестандардни изданија. Притоа, се оценуваат иновативниот пристап и уникатноста на изданието во рамките на нашето издаваштво.

„Уципуци размислува надвор од кутијата“ е креативна интерактивна книга и сликовница, која, покрај едукативната приказна и модерните илустрации, соодветни и привлечни за детската читателска публика, има и оригинален концепт, кој ги поттикнува децата на размислување и изнаоѓање нови решенија на различни „сопки“, задачи со загатки што се мошне интересни и ја продлабочуваат менталната активност кај децата, визуелни „илузии“ чие препознавање ги проширува видиците. Картонската играчка Уципуци, чии крилја се движат, е дополнителен подарок за секој млад читател на оваа книга и продукциски предизвик за секоја издавачка куќа. Целото издание е замислено така што треба да ги поттикне децата да пронаоѓаат повеќе нестандардни решенија за еден проблем.

 

За годинашните награди на МАИ одлучуваше комисијата во состав: Елизабета Баковска, писателка и книжевна теоретичарка, Александар Маџаровски, книжевен видеоблогер, и Дејан Џолев, графички дизајнер.

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.

    YouTube
    LinkedIn
    Share
    Instagram