Монс Мосесон е истражувачки новинар и добитник на многубројни награди. Извесно време работел и како продуцент на документарци за Шведското радио, а во моментов е репортер во „Дагенс нихетер“. Во 2021 година, ја објавува книгата „Тим – официјалната биографија на Авичи“ за шведскиот музичар Тим Берглинг, познат како Авичи. Книгата го прикажува Берглинг како главниот лик преку кој европската хаус-музика го освојува светот во 2010-тите, но зборува и за кризата со опиум во САД и менталните проблеми што претходеле на самоубиството на славниот музичар. Биографијата беше пречекана со огромно внимание и е опишана како „приказна за нашето време“ и како „најдоброто музичко новинарство“. Книгата беше една од најпродаваните во Шведска во годината на издавање, а оттогаш е преведена на петнаесетина јазици.