Децата прашуваат: разговор со Марија Пар

  /  Интервјуа   /  Децата прашуваат: разговор со Марија Пар

Децата прашуваат: разговор со Марија Пар

Марија Пар е исклучителна авторка на книги за деца од Норвешка. Нејзиниот прв роман, „Вафли во форма на срце“, е преведен на повеќе од дваесет и пет јазици и ги освои книжевните награди „Сорсиер“ (Франција) во 2010 година и „Зилферен хрифел“ (Холандија) во 2008 година и влезе во потесен избор за добивање на престижната награда „Браге“ (Норвешка). Воедно, според книгата е снимена популарна телевизиска серија за деца на најгледаниот ТВ-канал во Норвешка. Според книгата се направени и неколку театарски претстави. Нејзиниот втор роман, „Toње Глимердал“, ја доби норвешката книжевна награда „Браге“, како и „Критикс прајз“ во 2009 година. Марија Пар е магистер по нордиски јазици и книжевност и работи како наставник во основно училиште. Живее во Норвешка со своето семејство.

„Голманката и морето“ е долгоочекуваното продолжение на „Вафли во форма на срце“. Во оваа книга Триле и Лена веќе имаат 12 години и тргнуваат во авантури што се многу посериозни и многу поопасни. Палавата Лена ќе го натера својот пријател Триле повторно да тргнат во уште една неразумна авантура – со импровизиран сплав ќе испловат кон немирното море. Влегувајќи во светот на возрасните, Лена и Триле сфаќаат дека им претстојат многу повеќе одговорности.

Во овој разговор таа одговара на прашања од нејзините мали читатели

Зошто токму Триле ги раскажува приказните, а не Лена? (Мила, 10 години)

Зашто Триле е лик што најмногу ми наликува. И зашто е многу позабавно да се раскажува за Лена отколку за Триле. Мислам дека таа е онаа што ги прави сите забавни нешта.

Дали вие сте го доживеале во детството тоа што го пишувате во книгите? (Лука, 8 години)

Не. Сѐ е измислено. Но живеев на место многу слично на заливот Матилдевик и мојот секојдневен живот како дете беше многу сличен на животот на Триле и Лена. Среќа што тие не се толку будалести.

Која е вашата омилена детска книга? (Софија, 9 години)

Тоа е една шведска книга за деца, „Ќерката на Роња и Робер“. Мислам дека таа ми е омилената иако сега сум возрасна. Ја напиша Астрид Линдгрен, која ми е омилена авторка.

 

Што читате сега? (Ана, 12 години)

Сега читам биографија за еден норвешки илустратор и писател, Кјел Окруст. Сакам да читам за луѓето.

Дали авантурите на Лена и Триле ќе продолжат? (Максим, 13 години)

Напишав две книги за Триле и Лена и мислам дека нема да има уште една. Но кој знае?

Дали навистина постои заливот Матилдевик? (Лора, 10 години)

Не. Не постои навистина. Но, ако дојдете во моето село, на многу начини ќе ви се причини познато.

Дали имате деца? Дали ги сакаат вашите книги? (Беса, 9 години)

Имам две. Постарото ги сака моите книги, а помалото сѐ уште мисли дека се предолги и со премалку илустрации.

Дали е потешко да се пишува за деца или за возрасни? (Никола, 15 години)

И двете нешта се подеднакво тешки. Некои мислат дека е лесно да се пишуваат книги за деца, но навистина не е. Децата заслужуваат најдобро, затоа авторот треба навистина да се намачи.

 

 

„Децата прашуваат“ е во склоп на проектот UNITED WE READ!, реализиран со поддршка на програмата Креативна Европа на Европската Унија.

   

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.

    YouTube
    LinkedIn
    Share
    Instagram