Катерина Шошко: И кога не сум писателка, пишувам

  /  Интервјуа   /  Катерина Шошко: И кога не сум писателка, пишувам

Катерина Шошко: И кога не сум писателка, пишувам

 

 

1.Покрај тоа што вашата книга доживеа ново издание, какви други успеси ви има донесено во периодот од првото издание досега?

Бескрајно ме радува тоа што постојано добивам пораки на социјалните мрежи и на Goodreads од сосема непознати луѓе што ја купиле и читаат Случајот Чернобог. Книгата мина неколку кругови во трката за Роман на годината, и доби рецензии и од членовите на жири комисијата (бесценето за мене како авторка), но подоцна и од читатели кои решиле да напишат свој осврт. Благодарна сум за сè.

2. Како сте задоволни од вашата соработка со „Антолог“ и колку сметате дека соработката со одредена издавачка куќа е важна за успехот на едно дело?

Антолог ги сметам за „мои“. Уште кога ја пишував Случајот Чернобог знаев дека ним ќе им го пратам ракописот и не се покајав во ниту еден момент. Иако во денешно време не е мал бројот на автори што самостојно издаваат книги, сепак за мене соработка со издавачка куќа што има име и традиција е клучна. Секако и делото треба да има тежина и квалитет, но кога професионалци што си ја знаат работата ги преземаат конците во свои раце, мене како автор ми останува само едно – да пишувам.

3. Дали моментално пишувате и што ново да очекуваме од вас во блиска (или далечна 🙂) иднина?

Пишувам и како што одат работите се чини дека иднината е многу блиска.

4. Дали имате омилен лик од вашите книги и дали би можеле да го поминете животот во негово друштво (таков каков што сте го створиле)?

Кога пишувам често се прашувам дали одреден лик би се „дружел“ со мене, иако сме дијаметрално спротивни. Ги сакам сите ликови што ги пишувам, дури и aнтагонистите. Прва ми паѓа на ум Кристина, управителката на домот од Случајот Чернобог која со својата непретенциозност и автентичност би била многу забавна и смешна за муабетење со кафе. Јан би бил извонреден пријател со мирна и пријатна енергија и човечност. Нора можеби не би ме „трпела“ зашто ќе барам да ми покажува телекинеза и да ми одговара на прашања за иднината. Од Крвава Месечина би го издвоила Габриел.

5. Некои велат дека добар писател е 90% добар читател. Дали се согласувате со оваа изјава и доколку е така, кои автори имале најголемо влијание врз вас како писател?

Целосно се согласувам. Може да имате дарба за пишување, но како таа дарба би ги добила сите димензии ако не се чита?! Особено ако не се читаат квалитетни книги. Авторите што оставиле влијание врз мене се сите оние на чии книги сум се навратила повеќепати; Андоновски со Папокот на светот и Булгаков со Мајсторот и Маргарита – вонземски. Не можам да не ја издвојам и маестралната Маргарет Мичел. Ѝ се восхитувам на умешноста и спосбноста да направи совршен мозаик од зборови во Одвеано од виорот. Стилот на пишување, посветеното истражување на темата на која пишува, портретирањето на ликовите, наговестување на дејствијата, способноста да ти го држи вниманието будно иако ти „нуди“ книга од 1200 страници, безвременските ликови – фасцинантно.

6. Што сте кога не сте писател/ка?

Со оглед на тоа што мојата „дневна работа“ е поврзана со пишување, и кога не сум писателка, пишувам. Но, кога ќе го затворам лаптопот сум многу работи и гледам сите тие да бидат хранливи за мојот ум, душа и тело.

7. Овој разговор е во склоп на акцијата ЛЕТО СО МАКЕДОНСКИ АВТОРИ која трае од 11 до 22 јули. Нашата заедничка цел е секој читател во својот список „книги за на одмор“ да вклучи и дела од македонски писатели. Но која книга вие би им ја препорачале на нашите и ваши читатели да ја понесат со себе ова лето?

Јазикот е нашата татковина како што зборуваше Конески, а читањето книги на македонски јазик и од македонски автори е само еден од начините да се чува и негува овој јазик. Среќна сум што денес имаме богат избор на домашни автори и книги во речиси сите жанрови. Тешко ми е да издвојувам наслови, затоа најдобро ќе биде читателите да влезат во книжанрицата на „Антолог“ (или пак да го отворат сајтот https://antolog.mk/) и да им дозволат на книгите да ги изберат нив.

 

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.

    YouTube
    LinkedIn
    Share
    Instagram