Нов роман на Лејла Слимани

 

 

Наскоро во издание на „Антолог“ уште еден роман на познатата француско-мароканска писателка Лејла Слимани, под насловот „Во туѓа земја“ .

„Човечкиот свет е како оној на растенијата. На крајот едниот ќе надвладее над другиот. Еден ден портокалот ќе го совлада лимонот или обратно, но, како и да е, дрвото повторно ќе раѓа плодови што ќе ги јадат луѓето.“

Од авторката на бестселерот „Совршената дадилка“, нов роман за мултиетнички и мултирасен брак. Ова е првиот дел од планирана трилогија за жените, расата, издржливоста и женската моќ.

Матилда е продуховена млада Французинка, која се вљубува во Амин, згоден марокански војник од француската војска за време на Втората светска војна. По војната двојката се сели во Мароко. Додека Амин се труди да ја култивира карпестата почва и да ја направи плодна, Матилда чувствува дека нејзината виталност е нарушена од изолацијата, суровата клима, беспарицата и недовербата кон неа како странец. Оставена сама ги расте своите деца во свет чии правила не ги разбира, каде што богатите француски деца ја исмеваат ќерка ѝ поради старата облека и кадравата коса. Матилда станува сопруга на земјоделец и им пркоси на шовинизмот и репресивните социјални норми со тоа што им нуди медицински услуги на селаните.

Како што се зголемуваат тензиите меѓу Мароканците и француските колонизатори, Амин се наоѓа помеѓу два огна. Мароканците од една страна, негови сограѓани, и Французите од друга. Оженет со Французинка и горд на одлучноста на жена си, но посрамен од нејзиното одбивање да се потчини.

Овде сите, особено Матилда, живеат во туѓа земја, земјата на мажите.

Со првиот дел од оваа трилогија, Слимани прави свој придонес во борбата за еманципација на жената.