Опис
#3 инспекторот Виктор Николов
Декември, 2019 година. Полицискиот инспектор Виктор Николов по годишниот одмор се враќа на работа на Одделот за крвни деликти. Зимата на голема врата чука на портите на главниот град, кој полека се подготвува за претстојната празнична сезона.
Едно понеделничко утро, во Скопје е пронајдена убиена жртва во подрумот под градскиот трговски центар. Навидум обичното убиство со лихварска заднина бргу се покажува како покомплицирано, кога следната недела е пронајдена нова жртва, убиена под слични околности, без каква било поврзаност со претходниот случај. Одеднаш, Виктор со колегите од Одделот е соочен со свиреп сериски убиец, кој од страна на новинарската фела го добива прекарот Одмаздникот и кој зад себе не остава траги, освен мистериозната порака најдена на местата каде што напаѓа.
Како што одминуваат деновите и годината полека кулминира со новогодишната ноќ така растат и професионалниот и личниот влог за главниот инспектор, кој, освен што е принуден да ја следи трагата на убиецот низ разни делови од земјата, соочен е и со можноста конечно да се смири со поранешната сопруга…
*Книгата е достапна со потпис од авторот. Во коментар за нарачката нагласете доколку сакате да добиете потпишан примерок.
Ana Gjurova –
“Серијал за инспектор Виктор Николов”
АНДЕ ЈАНКОВ
Овој серијал на Анде е уште едно наше, а светско ремек-дело и вреди да се прочита.Иако јас дури сега ги прочитав неговите книги,сепак ми оставија впечаток и сум воодушевена.Серијал кој е толку добро раскажан и доловен,што уште со првиот дел ќе ве освои и ќе посакате и останатите два дела да не ги испуштите од рака.Анде добро и умешно ги споил секојдневието со животот на инспекторот и моменталната состојба во Македонија во моментот во кое се случува дејството и истиот момент кога е напишан делот од серијалот.Авторот е дефинитиввно предобар во раскажување,пишува во свој стил, а јас уживав додека го читав.Текстот сам си течеше и ме носеше со него,а употребата на некои изрази и зборови беше интересна.Уникатен стил кој е примамлив за читање.Серијалот е одличен,ликовите се добри,со различни приказни,но одлични.
“ Виенски гамбит”
Во првиот дел од серијалот Анде не носи во преубавата Виена.Инспекторот Виктор Николов 33-годишен и штотуку разведен, за време на својот одмор решава да го посети својот брат Даниел во Виена. Тој ја истражува Виена и запознава женска личност со која во склоп на околности,после таа вечер помината заедно,ќе мораат да бидат секојдневно во истражување.После прекрасната ноќ,Даниел запаѓа во проблем од кој спас може да му најде само неговиот брат.Девојката на Даниел е најдена мртва,а прв осомничен е Даниел кој тврди дека е невин.Но,дали е тоа така или не,дали може да му верува Виктор и дали навистина Даниел крие нешто,ќе дознаете кога ќе го прочитате ова дело.Овој крими-интригантен роман ме освои уште од прва,а Анде толку маестрално ќе ве прошета по Виена што ќе се телепортирате таму додека читате.Ќе имате чувство како да сте таму и да шетате по улиците и местата опишани во книгата.
“Сигурен ризик”
Во вториот дел Анде не шета низ улиците на Скопје,кој толку добро го опишал како да му е роден град.По две години од случката во Виена во Скопје се случува невообичаено убиство.Во багажникот на нејзината кола е пронајдено телото на новинарката Драгана Несторовска.Причината за смрт е давење и со нејзината смрт излегуваат на површина детали од нејзиното минато. А со тоа и одреден број на осомничени меѓу кои и кандидатот за Претседател на претстојните избори.Како осомничениот политичар има вмешано прсти во ова убиство или сепак нема,како тече истрагата и што на крај се открива вие самите ќе дознаете.Уште еден маестрален крими-трилер на Анде кој е возбудлив до самиот крај.Приказна која ќе ве воодушеви и изненади.
“Само Бог простува”
Дејството во третиот дел исто се случува во Скопје во декември,еден месец пред новогодишната еуфорија.Во подрумот на ГТЦ е најдено убиеното тело на првата жртва од сериски убиец.Додека мислат дека причината за ова убиство е лихварски долг,следната недела има нова жртва убиена на сличен начин како и првата.Иако жртвите немаат поврзаност меѓу себе,Одделот за крвни деликти открива дека се работи за сериски убиец кого новинарите го нарекуваат “Одмаздникот”.Зошто ги убива овие личности кои не се поврзани,кој е мотивот и зошто ја остава крвавата порака на местото на убиствата,ќе откриете читајќи го овој дел и верувајте ќе се изненаите на крајот.Во овој дел Анде ќе ве прошета и низ нашата мала Макединија и ќе ве воведе во истрагата вешто и маестрално.Во “Само Бог простува” се гледа дека авторот успеал да се надогради и помајсторски да го напише заплетот, а уште поуспешно да го кулминира расплетот.
Нема да згрешите ако го прочитате овој серијал.Дефинитивно го препорачувам и вреди да се прочита.Се навлеков на Анде и уживам во неговите книги.Кога ќе почнете со читање страните сами ќе летаат.Едноставно книгата те влече се подлабоко во приказната.За мене Анде е отркитие за оваа година и нема да зажалите ако го прочитате.Толку реално се раскажани настаните,доловено така природно,што ќе се внесете во самата истрага на инспекторот.Со овој серијал Анде докажа дека е незаменлив.Уживав во секој збор,секоја приказна,во секоја книга.Толку добро направено,осмислено,истражувано,одлични ликови и прекрасни приказни.Сакам да му честитам за овие маестрални книги, а посебно за неговата умешна нарација.Јанков е неверојатен писател,мајстор на својот занает.Браво мајсторе!
П.С.Извини што досега не те прочитав Анде,ако не ми простиш Бог простува.
“Смртта постои, не како спротивност на животот, туку како негов составен дел”. Харуки Мураками