Рецензија од прв читател: Билјана за „Бизарни раскази“ од Олга Токарчук

 

 

Ако книжевноста има право на нови идеи, тогаш Олга совршено го искористила тоа право да ни прикаже нова идеја за светот во кој живееме или за нашата свесност за него.

Со вклучување на фантастиката, науката, психологијата, екологијата, религијата, митологијата… Олга нѐ води од приказна во приказна. Вешто ни отвора нови прозорци во мозокот, нѐ тера да се преиспитуваме. Што и колку е бизарно? Светот и случувањата во него или нашата свест за нив?

Живееме во свет што галопирачки и неповратно се менува. Се оддалечуваме од природата до тој степен што веќе престануваме да сме дел од неа. Толку сме свртени кон сопствениот комфор што веќе не го забележуваме туѓото умирање.

Преку своите навидум „бизарни“ раскази, Олга ни покажува еден друг свет во кој таа би сакала да живее. Ненаметливо, на моменти забавно, на моменти морбидно ни ги покажува патиштата до тој свет. Колку треба да се измениме, да се вратиме назад. Колку чудовишта треба да победиме внатре, во себе, за да сфатиме дека само таму и постојат….

Ова ми е прва средба со Олга Токарчук и искрено сум воодушевена. Иако можеби моето пишување (неблагодарно е да пишуваш за нобеловец, да не речам бизарно) звучи како сè тука да е испомешано и конфузно, верувајте дека не е. Авторката е мајстор, секој лик е прецизно исцртан, секоја приказна претставува еден совршен микрокосмос. Па така, не само што јасно ни ги претставува своите идеи туку успева на некој начин да ни ги среди и прашањата што ни се вртат во глава околу бизарноста, чудовиштата, фантастичноста.

Зашто, на крајот, сѐ е сепак прво таму, во нашата свест.

„…овој свет е поток од сили и односи што се борат меѓу себе. Секое суштество има волја што му овозможува да живее. Реалноста се состои од милијарди битови што се поклопуваат едни со други, испреплетени во мрежата на волјата. Некои од нив се софистицирани и сликовити, а други бессилни и фаталистички. Во таков свет многу дотогаш незамисливи работи стануваат можни, а границите се покажуваат како илузорни.“

Нурнете во овие „Бизарни раскази“ без страв и предрасуди, па ќе ви откријат нови идеи и светови.

 

Пишува: Билјана Димовски