ТОП пет наслови за ова лето

  /  #bookworm   /  ТОП пет наслови за ова лето

ТОП пет наслови за ова лето

 

 

Лето, плажа, уживање под сонцето. Летото оди рака под рака со убава книга. Но изборот на добра книга не е секогаш лесна работа. Затоа ние се погриживме да одвоиме пет одлични наслови од „Антолог“ и да ви ги понудиме како предлог за летно уживање. А вие, се разбира, одберете си според вашиот книжевен вкус.

 

ЗА ЉУБИТЕЛИТЕ НА КРИМИ И МИСТЕРИИ

„Мали тајни“ од Џенифер Хилиер

Сè што е потребно да се разоткрие нечиј живот е само една мала тајна…

Марин има совршен живот. Омажена за својата љубов од факултетските денови, таа е сопственичка на синџир елитни фризерски салони, додека сопругот Дерек управува со сопствена компанија. Тие се почитувани членови во својата заедница и семејство полно со љубов. Сè додека не им се распадне светот дента кога е киднапиран нивниот син Себастијан.

Една година подоцна, Марин е претворена во сениште. ФБИ изгубило секаква трага. Таа и нејзиниот сопруг одвај зборуваат еден со друг. Марин најмува приватен детектив да продолжи со истрагата, но, наместо да го најде Себастијан, открива дека Дерек има афера со помлада жена. Ова откритие ја враќа Марин во живот. Го изгуби својот син, но нема да дозволи да го изгуби и сопругот. Кензи е непријател со име и презиме, што значи дека ова е проблем што Марин може да го реши.

 

ЗА ВЉУБЕНИЦИТЕ ВО БАЛКАНСКИ НЕПРЕДВИДЛИВИ ПРИКАЗНИ

 

„Островот на пеликаните“ од Миодраг Мајиќ

Уште една крими-драма што е сосем поинаква од која било книга од тој жанр.

Дејството ги следи судбините на двајца млади Роми, кои по игра на случајноста завршуваат во судница и доживуваат пресуда што отвора низа настани што никој не би можел да ги замисли.

Приказната за Ајша и Габриел, за Павле и Јована, е приказна за џелатите што стануваат жртви и жртвите што стануваат џелати на сопствената судбина. Тоа може да се претвори во сечија приказна, но уште веднаш се однесува на секого од нас. Токму затоа оваа книга ќе ја прочитате во еден здив, а силуетите на нејзините јунаци ќе се вкотват длабоко во вас.

Мајиќ никогаш немал шанса да одговори на обвинувањата против него. Не го сторил тоа зашто се држел до професионалниот кодекс и не сакал да зборува за случаите на кои судел. Наместо да ги толкува површните напади, судијата одговара со нова книга, која не само што претставува книжевно дело туку е и посебен чин од кој треба да учиме како да се бориме на правилен начин.

„Островот на пеликаните“ носи надеж дека борбата за општо добро секогаш има смисла.

 

ЗА ОНИЕ ШТО ЧИТААТ СЕМЕЈНИ И ЉУБОВНИ ДРАМИ

 

„Дабот сѐ уште е тука“ од Софија Лундберј

Потресен роман за копнежот, вината, бесмртното пријателство и пронаоѓањето животна рамнотежа по разурнувачката врска.

По тешкиот развод, на Естер ѝ се чини дека нејзиниот живот ја загубил смислата. Најболни ѝ се викендите што не ги поминува со синот. Во тие денови, секоја втора недела, оди кај стариот даб што расте крај водата. Еден ден под дабот ја среќава Рут, возрасна дама што има прекрасна особина секогаш да се насочи само врз тоа што е убаво во животот. Фасцинирана од неверојатната животна приказна на Рут, Естер со текот на времето ќе стане нејзина добра пријателка. Колку повеќе ќе стекнуваат меѓусебна доверба, сè поочигледно ќе биде дека Рут крие болни тајни. Откривајќи ги, Естер ќе стигне дури до Италија и езерото Комо, каде што ќе сфати дека животната приказна на Рут е многу поинаква отколку што можела да претпостави.

 

ОД АВТОРКАТА НА „СОВРШЕНАТА ДАДИЛКА“

 

„Во туѓа земја“ од Лејла Слимани

По меѓународниот успех на „Совршената дадилка“, Лејла Слимани раскажува страсна романса меѓу мароканскиот војник Амин, кој се борел на страната на Франција во Втората светска војна, и Французинката Матилда.

По завршувањето на војната, младиот пар се сели во Мекнес, Мароко. Брак, преселба, прво дете, второ дете… Илузиите наскоро се судираат со стварноста. Додека Амин ја обработува карпестата почва, Матилда се задушува од суровата клима – омразена од француските доселеници бидејќи се омажила за Мароканец и отфрлена од Мароканците бидејќи не е една од нивните. Амин, пак, иако ја сака својата сопруга, понекогаш се прашува зошто одбрал толку непокорна жена. Тие, но и сите ликови од романот, како да живеат „во туѓа земја“.

 

ИЗВОНРЕДНА ИСТОРИСКА И ШПИОНСКА ДРАМА

 

„Конци на судбината“ од Марија Дуењас

Возбудлив историски и шпионски роман во кој се испреплетуваат високата мода, политичките заговори и тајните служби. Младата шивачка Сира Кирога во 1936 година го напушта Мадрид спроти граѓанската војна за да замине со Рамиро, човек кого го познава кратко и во кого е лудо вљубена, оставајќи ги зад себе свршеникот и самохраната мајка. Се сместуваат во Тангер, светски и егзотичен град, во кој на почетокот водат живот од приказните.

Таму Сира доживува тешко предавство и останува сама и со многу долгови, принудена да се пресели во Тетуан, каде што со помош на пријатели со сомнителен углед отвора модно ателје за отмени клиентки. Пред крајот на граѓанската војна и во текот на подготовките за Втората светска војна во Европа, судбината ја поврзува со важни историски личности, меѓу кои Хуан Луис Бајгбедер, загадочниот министер за надворешни работи на Франко, Росалинда Фокс, неговата љубовница, и поморскиот аташе Алан Хилгарт, шефот на британското разузнавање во Шпанија. Тие ќе ја втурнат во тајна мисија чиј параван ќе биде нејзиниот занает.

Книга што ја издигна Марија Дуењас на врвот на најчитаните автори во Шпанија.

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.

    YouTube
    LinkedIn
    Share
    Instagram