Третиот дел од Бастанската трилогија на Нетфликс

 

 

Филмската адаптација на третиот дел од Бастанската трилогија, „Подарок за бурата“ премиерно се емитува на 24 јули на Нетфликс. Како што јавуваат од компанијата, заради пандемијата со корона вирусот емитувањето на филмот на големото платно во кината низ светот нема да се реализира, па оттука премиерата на Нетфликс ќе биде симултано за целиот свет.

Македонските љубители на трилогијата за феноменалната детективка Амаја Саласар овој пат ќе имаат можност прво да го погледнат филмот, додека, пак, книгата треба да пристигне до крајот на годината.

Со ова се заокружува и филмската трилогија базирана на книжевниот феномен на мегапопуларната шпанска авторка Долорес Редондо, која има продадено милионски тираж и преведена е на 30 јазици.

Режисер и на оваа филмска верзија е Фернандо Гонзалес Молина, кој и со вториот дел од Бастанската трилогија имаше рекордна гледаност, односно  само една недела по премиерата, „Заветот на коските“ беше најгледан филм на Нетфликс во Шпанија и во Италија, а помеѓу десетте најгледани во останатите европски земји.