„Антолог“ ја објави книгата „Во август“ од Јакуб Стањура

12/08/2026

„Антолог“ ја објави книгата „Во август“ од Јакуб Стањура

До каде сме подготвени да одиме заради другиот?

12 август 2026
Издавачката куќа Антолог од Скопје со големо задоволство соопштува дека во рамките на проектот ЕУрека: Читањето – семе на иднината! ја објави книгата:

„ВО АВГУСТ“ ОД ЈАКУБ СТАЊУРА

Ве известуваме дека е објавен македонскиот превод на романот „Во август“ од младиот чешки писател Јакуб Стањура, во превод на македонски јазик на Маргарета Карајанова. Во овој психолошки интензивен роман, на суптилен и оригинален начин се отвора темата на т.н. геслајтинг – форма на манипулација во која границите меѓу вистината и илузијата се бришат, а жртвата почнува да се сомнева во сопствената перцепција, сеќавања, одлуки и разум.

Додека во август сите се радосни, Даниела секоја година во тој месец нешто губи. Наместо утеха, летото ѝ носи болка; наместо прегратки, ја обгрнува анксиозност. Во семејството се чини дека никој со никого не е близок затоа што за ништо не се зборува отворено. Даниела се повлекува во читање и во пишување. Студира англиски јазик и книжевност со голем ентузијазам, а по завршувањето на првата година го запознава Штепан. Тие почнуваат врска и на Даниела ѝ се чини дека конечно се појавува излез од неподносливите лета и од сенките на минатото. Но тоа е само привидно. Вистинските проблеми допрва почнуваат.

Книгата на македонски јазик е објавена со поддршка на програмата Циркулација на европски книжевни дела во склоп на Креативна Европа на Европската Унија – Потпрограма „Култура“ и на Министерствата за култура на РС Македонија. Романот е достапен во книжарниците и преку дистрибутивната мрежа на издавачот.

За авторот: Јакуб Стањура (1995) е чешки писател. Дипломирал англистика и бохемистика на Карловиот универзитет во Прага. Веднаш по објавувањето на неговото романескно деби, „Во август“ (2023), станува книжевен бестселер, добива театарска адаптација и е преведено на неколку јазици. Во 2025 го објавува својот втор роман, „Медузи“. Неговиот стил е интимен, чувствителен и

аналитичен, со способност да вклучи длабоки социјални и психолошки теми во својата проза. Живее во Прага.

За преведувачката: Маргарета Карајанова (1972) е преведувач од чешки јазик и поранешен лектор по македонски јазик на Масариковиот универзитет во Брно, Република Чешка. Ги преведувала Милан Кундера, Томаш Змешкал, Хана Андроникова, Владислав Ванчура, Јиржи Хајичек, Михал Вивег, Радка Данемаркова, Даниела Ходрова, Јахим Топол, Патрик Оуржедњик, Ладислав Клима, Виктор Фишл, Луцие Фаулерова, Здењек Јиротка, Онджеј Штиндл и други. Преведува и книжевност за деца.

#ЕУрека #читањетосеменаиднината #EUrekaseedandread #EUreka #EUrekauthors #EUrekatranslators #EUrekaillustrators #TranslatorsOnTheCover #creativeeurope4books #creativeeurope

„ЕУрека: Читањето – семе на иднината!“ е книжевен проект кој опфаќа превод, издавање, дистрибуција и промоција на висококвалитетни книжевни дела, со посебен фокус на помалку користени европски јазици, жанровска разновидност, како и современи, ангажирани авторски гласови. Проектот е целосно усогласен со приоритетите на Европската Унија за културна разновидност, инклузија, родова еднаквост, еколошка свест, дигитализација и зелен развој, при што поврзаноста со природата е клучна концептуална и програмска оска.

Ние сме сериозно свесни за суровите предизвици пред кои се исправени планетата и човештвото и поради тоа „Антолог“ ја лансира „Се грижиме за планетата“, агенда за одговорно однесување кон природата и заедницата и со објавување на секоја нова книга, опфаќаме конкретни мерки и активности за еколошко, одржливо, етичко и социјално одговорно однесување.