Проектот Европска приказна / Europe (h)as a story e проект на Антолог кој го именувавме и го почнавме во 2013 година, со засилено објавување на книги од европски писатели, нешто што неформално го правиме од самите почетоци на издавачката куќа, но од наведената година сето тоа добива многу подлабока и покомплексна концепција.
Не само што објавуваме најмалку по неколку десетици квалитетни книги годишно од богатата европска литература, со посебен акцент на добитниците на Наградата за литература на Европската Унија, туку се грижиме истите да бидат иновативно и креативно претставени пред домашната публика, која не е само нем проследувач туку и учесник и соработник во ваквите настани и активности.
Со текот на времето, меѓу другото, стануваме препознатливи токму по објавувањето на овие дела и по гостувањата на познати писатели од цел свет. Несомнено, европската литература, со поддршката токму на Креативна Европа на Европската Унија, потпрограмата Книжевни преводи, станува сѐ повидлива и побарана од македонските читатели.
