Промоција на „Системот“ од Драгана Стојиќ

02 октомври, 2026

Издавачката куќа Антолог, со задоволство ви најавува:

Промоција на романот „Системот“

Ве известуваме дека во сабота на 03 октомври 2026 година, со почеток во 18:30 часот, во Books & Dogs Café, ќе се одржи промоцијата на романот „Системот“ од Драгана Стојиќ, во издание на „Антолог“.

Промотор на настанот ќе биде писателката и авторка на книги за деца, Марија Петровска.

„Системот“ е прв роман на авторката Драгана Стојиќ и носи необична приказна во која апстрактните поими се претворени во физички ентитети, со сопствени функции, односи и влијание врз постоењето.

Во светот создаден од Стојиќ, во центарот на приказната е Смртта, која од необјаснето незадоволство одлучува да се повлече од својата функција. Нејзиното отсуство предизвикува хаос во Системот, а останатите ентитети се соочуваат со ситуација за која не се подготвени и со последици кои не можат лесно да ги контролираат.

Драги Земјани,

Ве известувам дека несогласно со Законот за Работа, Обврска и Труд на ентитетите, јас, како Функција и Својство на Апстрактниот Систем и како дел од Животните Процеси давам Отказ и се повлекувам од мојата Должност и Инстинкт за Работа. Тоа значи дека повеќе нема да имам Влијание врз вас како независна активна материја и вие НЕМА ДА УМИРАТЕ. Со други зборови, вие ќе бидете БЕСМРТНИ. Долго Време, аналогно со Инстинктот За Преживување, вие се обидувате да ме избегнете, се плашите од мене, ме мразите и јас бев непожелна. Добри Вести за вас – јас за вас повеќе не постојам. Имајте среќен вечен Живот! Ви посакувам сѐ најдобро. 

Со Љубов,

Смртта

Во моментот кога Системот почнува да се распаѓа, Смртта добива неочекувана понуда за помош од еден свој колега – личност од која никогаш не би очекувала дека може да побара или да добие поддршка.

Токму оваа необична ситуација ја отвора приказната кон прашања за функционирањето на системите, меѓусебната зависност и односот меѓу животот, смртта и хаосот.

Драгана Стојиќ е родена во Скопје во 1997 година. Средното образование го завршила во „Марија Кири-Склодовска“ како фармацевтски техничар и првенец на генерацијата во 2016 година. Во 2021 година дипломирала на Природно-математичкиот факултет при УКИМ, како инженер по хемија.

Стојиќ извесен период работела како аналитичар во лабораторија, а паралелно со професионалниот пат постојано му се навраќала на пишувањето и творештвото. Нејзиниот интерес кон уметноста се појавил уште во раните години, додека науката станала една од инспирациите во нејзиното творештво.

Во рамки на промоцијатa, читателите ќе имаат можност одблиску да се запознаат со романот и со книжевниот свет во кој поимите што вообичаено ги доживуваме како апстрактни стануваат ликови со свои функции, односи и влијание врз целокупното постоење.