Промоција на книгата за деца „Како Мони и Марко ја спасија шумата“ на Надица Митевска

10 ноември, 2026

Издавачката куќа „Антолог“ со големо задоволство најавува:

Промоција на книгата „Како Мони и Марко ја спасија шумата“ од Надица Митевска

Денес (10.11.2026), ќе биде промовирана книгата за деца „Како Мони и Марко ја спасија шумата“ на авторката Надица Митевска, која е во издание на „Антолог“.

Промоцијата ќе се одржи во Општина Карпош, со почеток од 17.00 часот, а промотор ќе биде Дијана Петкова, која ја напиша и рецензијата за ова книжевно остварување на Митевска.

 

За книгата „Како Мони и Марко ја спасија шумата“

Книгата ја следи приказната за Мони и Марко, љубопитни близнаци кои ја обожаваат природата и нејзините тајни.

Но, една обична прошетка низ шумата се претвора во неверојатна авантура кога пред нив се појавуваат животни што зборуваат, мистериозни светлечки топки и цветни самовили со важна мисија.

Планетата Земја е во опасност.

Кога природата ќе побара помош, токму Мони и Марко се избрани да ја вратат нејзината рамнотежа.

Заедно со своите магични пријатели, близнаците ќе мора да покажат храброст, истрајност и вистинско пријателство за да ги надминат предизвиците што ги очекуваат.

Возбудлива приказна што ја буди еколошката свест и потсетува дека најголемите херои се оние со чисто срце – и дека секое дете може да стане чувар на нашата прекрасна планета.

„Авторката дозволува некои карактеристики, како што се стравот и плашливоста да се биде лидер, што честопати им се припишуваат на девојчињата коишто растат со тој печат и од којшто тешко се ослободуваат, да се преобразат во доблест да се направи првиот чекор, да бидат и машки карактеристики“ – вели Дијана Петкова во рецензијата.

 

За авторката

Надица Митевска  е родена 1972, во Тетово. Таа е дипломиран одделенски наставник на Педагошки факултет „Св. Климент Охридски“ во Скопје. Повеќе од две децении работи во воспитно-образовниот процес при што со љубов, креативност и посветеност ја гради читачката култура и емоционалниот развој кај учениците.

Добитник е на повеќе награди на литературни конкурси, меѓу кои први награди за поезија и проза, како и признанија од образовни институции. Активно учествува во национални и меѓународни проекти од областа на образованието, еколошката едукација и иновативните наставни практики.

Автор е на романот за деца „Новото место кое го нарековме дом“. Нејзиното творештво е насочено кон поттикнување на емпатијата, другарството, емоционалната интелигенција и вистинските вредности кај најмладите.

Иако е добитник на литературни признанија и награди, најголемата награда за неа останува блесокот во детските очи кога ќе препознаат дел од себе во нејзините страници.

За Надица, пишувањето не е само творештво – тоа е начин да се допре до срцето и да се остави светлина што трае.

Зашто, кога една учителка ќе почне да пишува,

таа не создава само приказна –

таа создава дом во кој секое дете може да се препознае.

Изданието на книгата за деца „Како Мони и Марко ја спасија шумата“ е финансиски поддржано од Општина Карпош, преку програмата на општината за субвенционирање проекти од областа на културата.