Марџан Сатрапи е француска илустраторка, писателка и режисерка од иранско потекло. Родена е во иранскиот град Решт во 1969 година. Мајка ѝ е правнука на персискиот шах Насир ел Дин, од династијата Каџар (владеел од 1848 до 1896), но своето образование го должи на родителите, марксисти од средниот сталеж, кои ја охрабрувале нејзината индивидуалност.

Пораснала во Техеран, каде што одела во француско училиште. Со желба да ја заштитат од политичките превривања, во 1983 година, родителите ја пратиле во Виена, каде што го продолжува школувањето. Факултет за ликовни уметности запишала во Иран, но потоа се сели во Франција. За време на студиите почнала да работи како илустратор на книги за деца.

Својата биографија Марџан Сатрапи детално ја опишала во графичкиот роман „Персеполис“, кој ѝ донел светска слава и бројни награди. Ова дело воедно е и прв ирански стрип, односно графички роман.