Марија Бабамова е родена во Кочани во 1949 година. Основното образование го започнува во Скопје. Уште во најраното детство, во основното училиште пишува поезија и проза за деца, кои ги објавува во списанијата „Колибри“, „Наш свет“, „Другарче“, „Развигор“ и други. Во средношколските и во студентските денови пишува поезија и повремено објавува во весниците „Млад борец“ и „Студентски збор“. Успешно ги завршува студиите по фармација и посветувајќи се на професијата објавува стручни трудови во списанијата „Фармацевтски информатор“, „Лекар“ и други. Во поново време објавува текстови во детското списание „Росица“. Понесена од емотивна инспирација, се пронаоѓа во пишувањето детска поезија и проза. Издава збирка песни за деца „Пеперутки“ и збирки раскази „Ирина“, „Магнолии“, „Ирина балерина“, „Верверички“, како и поезија за возрасни „Носталгија“, „Младешки опој“. Романот „Љубов на два континента“ е нејзината најнова книга.