Милчо Мисоски е роден 1972 г. во Струга. Тој дипломирал на Медицинскиот факултет во Скопје и е специјалист микробиолог, примариус, магистер на медицински науки. Мисоски е автор на неколку поетски збирки: „Чекајќи го ангелот“ (1992); „Чекајќи го ангелот“ / “Waiting for the angel” – второ издание со превод на англиски јазик (2019); „Записки“ (2013); „Изневерено време“ (2016); „Песочни капки“ (2017); „Стаклени сенки“ (2020); „Ефемиди“ (2022) и „Зборови од хартија“ (2024). Тој е застапен во антологиите: „Поетите од Струга“ (2001); „Дај две љубовни“ (2015); „Нема стих нема мир“ (2017); „Антологија на копнежот“ (2024). Неговата поезија е преведена на српски, хрватски, бугарски, албански и на англиски јазик.

Мисоски е добитник на повеќе награди за поезија: „Чекајќи го ангелот“ во 1992 година е прогласена за најдобра збирка поезија на конкурсот на Книжевна младина на Македонија, плакета „Поетијада“ (2019); Mili Dueli Online Balkan Poetry Contest – плакета за најдобар автор од Република Северна Македонија и плакета за интернационален придонес во развој на поезијата во 2019, 2020 – 2022; „Сина повелба МПФ „Панонски галеб“ (2020); МПФ „Литературни искри“ – Прва награда и Гран При во 2020 и 2022; „награда Караманов“ за 2022 и прва награда на „Охридски поетски бисер“ во 2023.

Милчо Мисоски е член на Друштвото на писатели на Македонија од 2024 година.