Рецензија од прв читател: Тања за „Конци на судбината“ од Марија Дуењас
„Казабланка“ би можело да биде второто име на „Конци на судбината“.
Овој смел и амбициозен роман на Марија Дуењас е посветен на тажната и несреќна историја на Шпанија од триесеттите и четириесеттите години на минатиот век. Времето на почетокот на бесмислената граѓанска војна и крајот на една романтична и бајковита врска со протекторатот Мароко.
Играјќи на картата фиктивно – нефиктивно, приказната носи возбудлива ритмика со изградени и нагласени реални ликови од највисоките политички и воени етажи водени од озлогласениот шпански диктатор Франциско Франко, познат како Генералисимус. Додека низ Европа беснее нацистичкиот апетит на Хитлер и се убедуваат и се пребројуваат новите сојузници, револуцијата носи поинаков дискурс во опустошената и гладна Шпанија, па новата Франкова справедливост ја гледаме низ перископ на деспотска манипулација на топло и ладно столче.
Во целиот тој вител од груби интриги и режимско владеење ќе се затече младата и наивна шивачка Сира Кирога. Нејзиниот едноставен и мирен живот со свршеникот Игнасио ќе биде засекогаш прекинат кога случајно во продавницата за машини за пишување ќе го сретне згодниот, шармантен, но и опасен шарлатан Рамиро.
Понесена од страста на таа чудесна љубов и од новиот живот што ќе го запознае токму со него, исполнет со гламур, луксуз и бескрајни вечерни уживања, лесно ќе ја убеди да го напуштат Мадрид и да заминат во Мароко, придружувајќи им се на шпанските колонисти што на таа територија уживале во привилегијата на богови. Во моментот кога ќе помисли дека од животот не би можела да посака повеќе, ќе го доживее најголемото предавство.
Оставена без милост, без пари и во големи долгови, ќе се соочи со единствениот можен излез пред кој стојат опасни патишта, наоѓајќи се во сосема поинаков и непознат свет, таму каде што царуваат лукавството, снаодливоста, сплетките, но и решителноста и храброста. Ваквиот пресврт ќе ја втурне во животна авантура по која никој не останува ист.
Конците и шнитовите, кои се нејзината единствена професија, единственото нешто што знае да го работи, ќе ѝ овозможат да управува со новата улога на една поинаква и зрела Сира, Сира во друштво со најголемите имиња од политичката елита, Сира во служба на шпион на високоорганизирана корумпирана, подмолна и расипана пајакова мрежа.
Дуењас направила вистинска мозаична палета од повеќе жанрови, лежерна раскажувачка дескрипција со ненаметлив тон, користејќи ги конците не само како шивачки инструмент туку и како метафорична подврска на минатото и иднината, војната и по војната, луѓето и местата. Книга во која е забележан длабок психолошки профил на ликовите и хероите, внимание што целосно е насочено кон повторно воздигнување на скршениот шпански народен дух, а богатиот наратив на живописни и топли нишки на бои и мириси од прекрасни и различни култури, секоја со одмерена убавина, ѝ дава посебен егзотичен шарм.
Пишува: Тања Петковска
