Книги на Брајово писмо донирани во Државното училиште за лица со оштетен вид „Димитар Влахов“
Убавиот збор продира до душата на секој читател, независно како тој ќе дојде до него. Важно е сите љубители на убавиот пишан збор да имаат достапност до литературни дела – на начин кој ним им одговара и кој е најлесно да ја оживува приказната.
Како дел од инклузивната програма на „Антолог“, неодамна издадовме два наслови од нашата едиција „Бранови“, кои сега се достапни на Брајово писмо. Книгите се комплетно адаптирани за лица со оштетен вид, во формат на кој најмногу им одговара. Се одлучивме да одбереме книги кои ќе одговараат за деца на повеќе возрасти, па така ги избравме насловите „Чекорите до црешовото дрво“ од Паола Перети, која е авторка со оштетен вид, и едно од делата на новиот Гинисов рекордер Елој Морено – „Невидлив“.
Оваа иницијатива, како нов момент во инклузивната програма на „Антолог“, подразбираше дека овие книги нема да да бидат достапни за продажба, туку ќе се донираат за институции каде што се најпотребни. Претставници од издавачката куќа лично се сретнаа со претставници на институциите и им ги доставија книгите.
Првата институција во која беа доставени примероци од „Чекорите до црешовото дрво“ и „Невидлив“ на Брајово писмо беше Државното училиште за деца и младинци со оштетен вид „Димитар Влахов“ – Скопје. При оваа хумана и емотивна средба, покрај донацијата, се разговараше и за натамошна соработка со цел да се прошири изборот на инклузивна литература, достапна за сите.
Од училиштето споделуваат:
„Нова донација за нашето училиште!
Денес го збогативме нашиот фонд на книги на Брајово писмо со два вредни наслови – „Чекорите од црешовото дрво“ и „Невидлив“, донација од издавачката куќа АНТОЛОГ – Книжевен центар. 
Овие книги ќе им овозможат на нашите ученици да уживаат во уште повеќе литературни дела, достапни на начин кој им одговара.
Со претставниците од Антолог разговаравме и за други можни соработки во блиска иднина, со цел да продолжиме да го збогатуваме пристапот до литература за лицата со оштетен вид.
Голема благодарност до Антолог за оваа донација и за нивната поддршка во градењето инклузивно општество!“
Оваа иницијатива е дел од проектот „Создадено во Европа“, ја истакнува мисијата на „Антолог“ – да ја направи книжевноста достапна за сите и да поттикне рамноправен пристап до културните содржини.
Изданијата од „Чекорите до црешовото дрво“ и „Невидлив“ на Брајово писмо не се достапни за продажба. Тие може да се најдат исклучиво во институциите каде што се донирани – Државното училиште за деца и младинци со оштетен вид „Димитар Влахов“ – Скопје, Националната универзитетска библиотека „Св. Климент Охридски“ и Градската библиотека „Браќа Миладиновци“ – Скопје.
