„Антолог“ го објави романот „Флора“ од Јонаш Зборжил

12/11/2026

„Антолог“ го објави романот „Флора“ од Јонаш Зборжил

Необична еколошка дистопија.

12 ноември 2026

Издавачката куќа Антолог од Скопје со големо задоволство соопштува дека ја објави книгата:

„ФЛОРА“ ОД ЈОНАШ ЗБОРЖИЛ

Со задоволство информираме дека е објавен романот „Флора“ (Flora) од чешкиот писател Јонаш Зборжил, во превод на македонски јазик на Соња Стојменска Елзесер. Во книгата се испреплетени родителството, љубовта, природата и технологијата, создавајќи вознемирувачка, но истовремено нежна визија за иднината на човештвото.

Една ноќ, Адам и Сара пронаоѓаат необично суштество на периферијата на градот. Не личи ниту на животно ниту на растение, а неговото тело е чудна комбинација од жива материја, кабли и жици. Не знаејќи што точно пронашле, решаваат да го однесат во старата викендичка на бабата на Адам, сместена во Степата – запуштен дел од градот што полека го освојува природата. Му го даваат името Флора.

Така започнува романот на чешкиот писател, поет и новинар Јонаш Зборжил, кој сега е достапен и за македонските читатели во издание на Антолог.

Адам и Сара се долгогодишни партнери кои се соочуваат со тешкотии во остварувањето на родителството. Неочекуваното откритие постепено ќе ја промени нивната секојдневност. Додека Флора расте и се развива во суштество што им е сè потешко да го разберат, меѓу нив се создава необична врска, исполнета со нежност, страв, приврзаност и потреба за грижа. Но, дали љубовта е доволна кога не знаеме што е она што го сакаме? И дали родителството подразбира биолошка врска или, пред сè, подготвеност да се грижиме за друго суштество?

Во романот, Зборжил создава необичен свет на границата меѓу цивилизацијата и дивината, живото и неживото, природното и вештачкото. Степата е простор на урбано распаѓање, напуштени објекти и заборавени места, во кои природата повторно воспоставува свои правила. Токму ваквите простори, кои авторот ги поврзува со запуштените делови на Прага, се една од главните инспирации за романот.

„Флора“ не е само приказна за необично суштество, туку и размислување за светот што го создаваме и за последиците од нашата интервенција во природата. Во време кога еколошките катастрофи, технолошкиот развој и промените во човековото опкружување стануваат дел од секојдневието, романот поставува прашање што звучи сè помалку како научна фантастика: што ако природата почне да создава нови форми на живот од остатоците на нашата цивилизација?

Поетичен, лирски и истовремено вознемирувачки, романот ги спојува елементите на дистопија, хорор и еколошка фикција. Неговата необична атмосфера е надополнета со препознатливиот поетски јазик на авторот, кој преку впечатливи метафори ја замаглува границата меѓу убавото и застрашувачкото.

„Флора“ е прозен дебитантски роман на Јонаш Зборжил (1988), кој претходно се афирмирал како поет и новинар. Неговата поетска збирка „Подоли“ (2013) беше номинирана за наградата „Јиржи Ортeн“ и за „Магнезија Литера“ во категоријата откритие на годината, а во 2020 година ја објави и збирката „Нова дивина“. Зборжил работел како водител на книжевни и културни емисии на чешкото Радио Вејв, а од 2022 година ја уредува културната рубрика на медиумот „Сезнам Зправи“.

По објавувањето во 2024 година од страна на чешката издавачка куќа Пасека, „Флора“ го привлече вниманието и надвор од границите на Чешка. Преводните права се продадени во деветнаесет држави, меѓу кои Франција, Германија, Италија, Холандија, Данска, Словенија, Србија, Хрватска, Велика Британија и Македонија.

„Флора“ е роман за родителството и љубовта, но и за природата што не престанува да се менува, дури и кога човекот верува дека ја има ставено под контрола. Приказна за едно суштество што не знаеме како да го именуваме, но можеби треба да научиме како да го сакаме.

Книгата на македонски јазик е објавена со поддршка на Министерството за култура на Република Чешка. Достапна е во книжарниците и преку дистрибутивната мрежа на издавачот.

Ние сме сериозно свесни за суровите предизвици пред кои се исправени планетата и човештвото и поради тоа „Антолог“ ја лансира „Се грижиме за планетата“, агенда за одговорно однесување кон природата и заедницата и со објавување на секоја нова книга, опфаќаме конкретни мерки и активности за еколошко, одржливо, етичко и социјално одговорно однесување.