Илија Магденоски е роден на 1 август 1956 година во с. Белица, Кичево. Завршил средно училиште за внатрешни работи во Скопје (1971-1975), дипломиран социјален работник на УКИМ. Дванаесет години поминал на работа во дипломатско-конзуларни претставништва на СФРЈ во Сиднеј, 6 години во Мелбурн и 4 години во Амбасадата на Република Македонија во Словенија, како и во Амбасадата во Ватикан. Пред враќањето во Република Македонија од Австралија, два месеца престојува во Сингапур и во Малезија, а во Македонија се враќа во февруари 1992 година, во екот на војната, кога бил приведен на аеродромот „Сурчин“ во Белград за да биде упатен на фронт во Вуковар. Во годините поминати во Министерството за внатрешни работи има можност да престојува во Диселдорф, Каиро и на други места, при што се стекнува со многу знаења и вештини. Пензионерските денови ги минува пишувајќи, градејќи макети, претежно цркви, создавајќи текстови за песни и шетајќи по убавиот Охрид.