Иво Митев  Жиле е роден на 14.08.1977 год. во Скопје. Студирал на Унивезитетот „Св. Кирил и Методиј“ во Скопје каде дипломирал на Филозофскиот факултет при Институтот за класични јазици. Вработен е во Археографскиот центар при НУБ „Св. Климент Охридски“ – Скопје. Пишува уште од студентски денови. Го интересира кратката прозна форма. Покрај раскази, пишува и драми. Магистрирал во 2019 година на Универзитетот за аудиовизуелни уметности – Скопје на одделот Драматургија. Дебитирал на книжевната сцена во Македонија во 2014 год. години во списанието за литература, уметност и општествени прашања „Современост“. Објавувал и во списанието за литературни, културни и општествени прашања: орган на клубот на младите писатели од Прилеп „Стремеж“. Оттогаш редовно објавува во овие списанија. Во 2015 г. ја добил третата награда на конкурсот за краток расказ што го распишува весникот „Нова Македонија“ за расказот „Небесна фотографија“. Во 2019 г. во издание на издавачката куќа „Дата Песнопој“ од Битола ја издал неговата прва книга „Небесна фотографија и други раскази“. За неа е добитник на втората награда на „Дата Песнопој – Битола Книжевни Меридијани“. Во 2020 г. излегува од печат драмата за Григор Прличев „Луѓе меѓу луѓето“ во издание на издавачката куќа „Аламанах“ од Скопје. Застапен е во антологиите „Света песна. 2“ и „Поетски бранувања 2020 : Маџирмаалски поетски средби“. Член е на Македонско-турското друштво на пријателството. Во 2021 година, неговата книга „Клучот за животот“, е објавена од Арс Ламина. Составувач е на постхумното издание на книгата на Зафир Хаџиманов „Песните на мојот живот : избрани песни“ која минатата година ја објави издавачката куќа „Македонија презент“ од Скопје. Преведен е на српски, а неговата приказна е објавена во електронското книжевно списание ECKERMANN. Неговата последна книга, а воедно и прв роман е „73 дена“ во издание на Арс Либрис.