Маја Митровска (1982) е родена во Битола. Во родниот град завршува средно музичко училиште, дипломира и магистрира на Националната музичка академија „Панчо Владигеров“ во Софија, Бугарија, а се усовршува во Виена, Австрија. Од 2009 година со своето семејство живее во Битола, каде што од 2010 година работи како професор по соло пеење во Државното музичко училиште.

Музичкото образование игра голема улога во пишувањето на проза богата со ритам и рима, кои се нераскинлив дел од една музичка нумера. Децата ѝ се најголема инспирација во творењето, така што се јавува како текстописец на повеќе композиции за детски музички фестивали, детски химни, како и на две музичко-театарски претстави: „Преспанска новогодишна елка“ и „Дома за Велигден“. Добитник е на наградата „Златно перо 2018“ за збирките поезија за деца „Кажувалки“ и „Крукалезен свет“. Дел е од тимот што ја создаде Детската химна на Битола во 2021 година.

Нејзината поезија е присутна во повеќе меѓународни збирки поезија од група автори. Во 2016 година е добитник на втората награда на меѓународниот поетски конкурс на тема „Илинден“ за поемата „Ден пред Илинден“. Истото дело е инспирација за создавањето на битовата драма „Вера, љубов и надеж“, која прерасна во музичко-сценска драма „Надеж“, премиерно изведена под Камерна опера – Битола во 2019 година, а подоцна е изведена во склоп на Меѓународниот фестивал „Илинденски денови“. 

Истата година е дел од уредничкиот тим на книгата „За музиката“ на академик Георги Здравев.

По професија музичар, десет години концертира и е учесник во музичко-сценски проекти во Република Бугарија, каде што покрај концертната дејност, настапува во неколку продукции на опери и оперети во главна улога. По нејзиното враќање во Македонија,  активно учествува во културниот музички живот во Битола и во други градови, како дел од повеќе културни манифестации, со солистички и камерни концерти и со главни улоги во проекти на Битолската опера.