М-р Жарко Кујунџиски (Скопје, 1980) – македонски романсиер, есеист, драмски автор, поет, преведувач и филмски критичар. Дипломирал во 2003 година, а подоцна и магистрирал на Катедрата за општа и компаративна книжевност при Филолошкиот факултет „Блаже Конески“ во Скопје.

Бил колумнист во дневните весници „Утрински весник“ и „Дневник“, основач и уредник на електронското списание „Репер“ (www.reper.net.mk), копирајтер во маркетинг-агенција и прес-координатор на Филмскиот фестивал „Браќа Манаки“ од Битола. Главен уредник е на издавачката куќа „Антолог“ од Скопје.

Автор е на 11 книги. Негови дела се преведени на англиски, српски, хрватски, словенечки, полски, германски, турски, бугарски, италијански, украински и на албански јазик. Застапен е во повеќе антологии на македонската проза и поезија. Неговиот расказ „Кога се губат очилата“ е дел од реномираната антологија The Best European Fiction 2013.

Добитник е на голем број книжевни награди и на една награда за глума. Член е на Друштвото на писатели на Македонија и на македонскиот ПЕН-центар.

Приредувач е на Јас имам сон (2010), антологија на најзначајните светски и македонски говори на сите времиња, и на Дај две, љубовни! (2015), антологија на љубовни песни од автори од Европа. Ги превел од англиски на македонски јазик култниот роман Појадок кај Тифани од Труман Капоти (2006) и сценариото за филмот Евтини приказни (2008).

Романот Spectator е прв дебитантски роман во современата македонска книжевност со осум изданија и досега е преведен на полски и на англиски јазик.

 

Авторски книги:

Spectator (роман 2003, прво издание),

Ендрју, љубов и други непогоди (драми 2004),

Америка (роман 2006, прво издание),

Сузан (песни 2008, како Џеси Блејз),

Најдено-загубено (роман 2008, прво издание),

13 (раскази 2010),

Мојата Сузан повторно девојка (песни 2011, како Џеси Блејз),

Најкраткото долго (студија, 2012),

Скопје и сè е можно (роман, 2013),

Тино од мојот влез, (сликовница за деца, 2015),

Ние предметите (поезија 2016),

Сфинга на гневот (роман 2020),

Новите авантури на Тино од мојот влез (сликовница за деца, 2021).

 

Приредил:

Јас имам сон (2010), антологија на најзначајните светски и македонски говори на сите времиња

Дај две, љубовни! (2015), антологија на љубовни песни од автори од Европа.

 

Преводи:

Труман Капоти, Појадок кај Тифани, „Антолог”, Скопје, 2006.

Квентин Тарантино и Роџер Евари, Евтини приказни, „Антолог”, Скопје, 2008 (заедно со Златко Кујунџиски).