Драги Михајловски (Битола, 16 октомври 1951 – Скопје, 21 февруари 2022) бил македонски поет, раскажувач, романописец, есеист, преведувач и универзитетски професор. Во родниот град го поминал своето детство, а таму го стекнал и основното и средното образование. Дипломирал англиски јазик и книжевност на Филолошкиот факултет „Блаже Конески“ во Скопје. Магистрирал на истиот факултет („Книжевниот лик на Скендербеј кај Прличев и во делата на англиски јазик“), а докторирал исто така во Скопје („Очудување и можни преводни модели врз примери од англиската поезија“). Од 1976 година работел на Филолошкиот факултет „Блаже Конески“.

Бил член на Друштвото на писателите на Македонија од 1992 година, на ПЕН на Македонија од 1992 година, како и на Асоцијацијата на писателите за мир во Вашингтон, САД, од 1998 година. Бил уредник на книжевните списанија Lettre Internationale, Стожер, Стремеж, член на Сенатот на универзитетот „Св. Кирил и Методиј“ во Скопје, а две години (2007-2008) бил и претседател на Комисијата за издавачка дејност во Министерството за култура на РМ. Погребан е во Битола. Тој е еден од најнаградуваните, најанализираните, најомилените и најпреведуваните писатели во Македонија.

Автор е на девет збирки раскази, осум романи, две книги за деца и две студии од областа на преведувањето. Од англиски на македонски превел повеќе од 130 000 стихови, меѓу кои 37 драми и 154 сонети од Вилијам Шекспир и други класични автори од англиската поезија како Колриџ, Милтон, Јејтс, Елиот итн.