Лидија Капушевска Дракулевска (Штип, 1962), редовен професор на Катедрата за општа и компаративна книжевност на Филолошкиот факултет „Блаже Конески” при Универзитетот „Св. Кирил и Методиј“ во Скопје (УКИМ). Се занимава со историја на европските книжевности од 19. век до денес и со компаратистика. Како книжевен критичар и есеист, објавува студии и есеи од областа на современата македонска книжевност, книжевната фантастика, толкување на поетски текстови и компаративно проучување на книжевните феномени.

Член е на Македонскиот ПЕН-центар, на Друштвото на писателите на Македонија, на Друштвото на компаратисти на Македонија, на меѓународните асоцијации за компаратистика (AILC/ICLA и на Европската мрежа за компаративни книжевни студии REELC/ENCLS), како и на Македонскиот славистички комитет. Актуелен член на редакцијата на списанието Културен живот (од 2018 г.) и на Athanatic. (Списание за фантастика во книжевноста и уметноста, Подгорица – Црна Гора, од 2022 г.). Авторка е на преку дваесет книги есеи, критики, книжевни разговори, антологии.

Објавени монографски студии: Во лавиринтите на фантастиката: фантастичниот расказ во македонската литература (1998, II изд. 2004); Поетика на несознајното: симболистички импулси во совремната македонска поезија (2001); Поетика на изненадувањето: надреалистички импулси во совремната македонска поезија (2003); Маргарита по трагите на Мајсторот: студии и есеи (2006); Калеидоскоп: студии и есеи (2011); Созвучја: студии и есеи (2015); Мозаик од гласови: огледи за македонската книжевност (2018); Авторот во огледало: книжевни разговори со македонски писатели и огледи за нив (2021); Свет зад светот (2023); Птици во аквариум. Надреализам 1924-2024 (2023), заедно со акад. Влада Урошевиќ, Градоначалникот на Хипнополис: дијалози за книжевното дело на Влада Урошевиќ (2024), заедно со Владимир Мартиновски (2024) и Писма и поетики (2025).

Двапати ја добила наградата „Димитар Митрев“ за најдобра книга критика и есеистика на ДПМ –  за Мозаик од гласови во 2018 г. и за Птици во аквариум – заедно со акад. Влада Урошевиќ, во 2023 г.