Мореа Баниќевиќ е родена во 1981 година во Риека, Хрватска, каде што живее и денес. Дипломирала на Филозофскиот факултет во Риека, а работи како учителка по англиски јазик во едно основно училиште во Опатија. Таа е долгогодишна веганка, се интересира за правата на животните, за еколошките прашања и за информатика. Во своето слободно време чита, пишува, игра компјутерски игри и ги шета своите кучиња Гриша и Нури.

Авторка е на четири книги, трилогијата составена од: „Демонот од училишната библиотека“, „Двојниците од темнината“, „По трагите на Црниот Петар“, како и книгата „Месечарите од Монтериера“.

За „Демонот од училишната библиотека“ ја добила наградата „Сфера“ за најдобар роман за деца за 2015 година.

За „Двојниците од темнината“ ги добила книжевните награди и признанија: „Сфера“ за 2019 (за најдобар роман за деца); „Птичка Григор Витез“ за 2019 (награда за најдобро книжевно дело по избор на жири-комисијата составена од деца) и признанието „Григор Витез“ за промоција на фантастиката во книжевноста за деца за 2019 година.