Владимир Мартиновски (1974) e поет, раскажувач, есеист, теоретичар, преведувач. Работи како вонреден професор по предметот компаративни поетики на Катедрата за општа и компаративна книжевност, при Филолошкиот факултет „Блаже Конески“, Универзитет „Св. Кирил и Методиј“.

Автор е на книжевно-теориските студии и книги есеи:

• Од слика до песна – интерференции меѓу современата македонска поезија и ликовните уметности (2003)
• Споредбени триптиси (2007)
• Слики за читање – аспекти на екфразиската поезија (2009)
• Споредбени диптиси (2011)
• Зоон поетикон (2013).

Автор е на книгите поезија:

• Морска месечина (2003)
• Скриени песни (2005)
• И вода и земја и оган и воздух (2006)
• Ехо од бранови (2009)
• Квартети за читање, гледање, пеење и слушање (2010)
• Побрзај и почекај (2011)
• Пред и по танцот (2012)
• Вистинска вода (2014).

Објавил и два повеќејазични избори поезија:

Портрет на поет со чадор (2011), Обратен профил (2011).

Приредил неколку антологии: Ut pictura poesis – поезијата во дијалог со ликовните уметности, тематски избор од македонската поезија (2006), Кога пеперугата станува песна (заедно со Лидија Капушевска-Дракулевска, 2010), Нов македонски хаику-бран (2011), Лирски додекамерон (2012), како и неколку зборници научни трудови од областа на книжевноста.

Член е на Извршниот одбор на Меѓународната асоцијација за семиотика и на Извршниот одбор на Европската мрежа за компаратистички проучувања. Член  е на Друштвото за компаративна книжевност на Македонија, Меѓународната асоцијација за компаративна книжевност, Друштвото на писателите на Македонија и Македонскиот ПЕН центар.

Добитник е на прва награда на Конкурсот за краток расказ на „Нова Македонија“ за 2009 година (за расказот „Бубамара на зрно калинка“), на наградата „Браќа Миладиновци“ на Струшките вечери на поезијата за 2010 година (за книгата Квартети) и на наградата „Димитар Митрев“ за книжевна критика и есеистика во 2013 година (за книгата Зоон поетикон).