Две дела на Брајово писмо донирани во Градската библиотека „Браќа Миладиновци“ во Скопје

 

Бидејќи читањето е право, а не привилегија, па така и нашата мисија е јасна! Книгите треба да бидат достапни за сите. Оваа иницијатива е чекор поблизу до свет во кој секој читател, без разлика на предизвиците, може да ја почувствува моќта на раскажаните приказни.

Како дел од инклузивната програма на „Антолог“, неодамна издадовме два наслови од нашата едиција „Бранови“, кои сега се достапни на Брајово писмо. Книгите се комплетно адаптирани за лица со оштетен вид, во формат на кој најмногу им одговара. Се одлучивме да одбереме книги кои ќе одговараат за деца на повеќе возрасти, па така ги избравме насловите „Чекорите до црешовото дрво“ од Паола Перети, која е авторка со оштетен вид, и едно од делата на новиот Гинисов рекордер Елој Морено – „Невидлив“.

Оваа иницијатива, како нов момент во инклузивната програма на „Антолог“, подразбираше дека овие книги нема да да бидат достапни за продажба, туку ќе се донираат за институции каде што се најпотребни. Претставници од издавачката куќа лично се сретнаа со претставници на институциите за да им ги достават книгите.

Примероци од „Чекорите до црешовото дрво“ и „Невидлив“ на Брајово писмо беа донирани во Градската библиотека „Браќа Миладиновци“ во Скопје.

 

Од библиотеката споделуваат:

„По донацијата на „Чекорите под црешевото дрво“ од Паола Перети на Брајово писмо, нашите пријатели од АНТОЛОГ – Книжевен центар ни подарија уште едно многу значајно издание наменето за лицата со оштетен вид – „Невидлив“ од Елој Морено.

Станува збор за мошне популарна книга за деца, но и за возрасни, приказна што гласно и јасно зборува и за другата страна на насилството.

Им благодариме на Антологџии за изданијата на Брајово писамо донирани за нашето катче за лица со оштетен вид што наскоро ќе биде и официјално отворено.

Книгата не е привилегија, туку основно човеково право!“ 

Оваа иницијатива е дел од проектот „Создадено во Европа“, ја истакнува мисијата на „Антолог“ – да ја направи книжевноста достапна за сите и да поттикне рамноправен пристап до културните содржини.

Изданијата од „Чекорите до црешовото дрво“ и „Невидлив“ на Брајово писмо не се достапни за продажба. Тие може да се најдат исклучиво во институциите каде што се донирани – Државното училиште за деца и младинци со оштетен вид „Димитар Влахов“ – Скопје, Националната универзитетска библиотека „Св. Климент Охридски“ и Градската библиотека „Браќа Миладиновци“ – Скопје.