ПРОМОЦИЈА НА „НЕ ПРАВЕТЕ ИМ СЕНКА НА ГРОБОВИТЕ“
23 јуни 2020, Скопје – Издавачката куќа „Антолог“ од Скопје со огромно задоволство ја најавува промоцијата на книгата раскази „Не правете им сенка на гробовите“ од младата македонска авторка Дијана Петрова. Настанот ќе се одржи на 25 јуни 2020 година, со почеток во 20 часот, пред платото на МКЦ. Промотори на книгата ќе бидат Фросина Пармаковска и Марија Гиревска, а модератор Тамара Котеска.
Дијана Петрова е родена на 8 април 1992 година во Делчево. Дипломирала на Филолошкиот факултет „Блаже Конески“ во Скопје, на Катедрата за македонска книжевност и јужнословенски книжевности. „Не правете им сенка на гробовите“ е нејзина втора објавена книга, по „Бдеењето над себе“ од 2018 година.
Гнев, сладострастие, алчност, гордост, мрзливост, завист и ненаситност се седумте смртни гревови – страшните искушенија на човековата душа. Збирката „Не правете им сенка на гробовите“ од Дијана Петрова е обид да се натераат читателите да го забележат она што вообичаено им се искраднува од погледот. Преку отелотворувањето на седумте смртни гревови во тела и во дела, овие раскази длабоко допираат до нашите сетила и свест. Преку ликовите што се доведуваат на работ на лудилото се прикажува апсурдноста на постапките во животот и се поставува прашањето: дали тоа што смртта е неизбежна прави таа да биде нелогична?
„Збирката раскази Не правете им сенка на гробовите е мошне возбудливо и уникатно четиво поделено во седум дела со по три целини насловени според седумте смртни гревови – секоја од нив е едно посебно патување внатре низ светот што Петрова го гради со филантропска вештина и внатре низ светот на секој оној што ќе тргне по овие наративни патувања. Светот во кој авторката нè води е и обичен и необичен, мистериозен и банален, близок и далечен, населен со ликови со широка палета од најразлични особености во чија бизарност, сепак, лежи човечкото. (…) Оваа книга остава жиг, не на телото, туку на душата на читателот, кој сака да тргне во една ваква силна и возбудлива авантура и поради тоа, како и поради зрелоста, умешноста, мудроста на овие раскази, односно на нивната авторка“, вели во рецензијата кон книгата Фросина Пармаковска.
„Градени врз идејата за гротескно справување со смртта, расказите на Петрова се свесно исконструирани бизарни приказни што го водат разумот во еден онирички хронотоп, базиран врз добропрепознатливата опозиција невино vs грешно. Со оглед на фактот дека во нив препознаваме една урбана логика, базирана врз содржини и теми од реалноста, можеме да кажеме дека во својот најнов ракопис Петрова негува еден нов трики реализам на кој ревносно му се враќа во секој нареден расказ. (…) Темите на нејзините раскази осветлуваат секојдневни ситуации, но на еден бизарен и на моменти гротескен начин. Затоа, повеќето од нив добиваат интересна фокализација. Некои дури и содржат психопатски призвук, па затоа би рекла дека се наменети за читатели со здрав желудник и без предрасуди“, пишува рецензентката Ангелина Бановиќ-Марковска.
За време на настанот строго ќе бидат почитувани сите мерки и препораки за превенција од вирусот КОВИД-19.
