Рецензија од прв читател: Симона за „Преживеаните девојки“ од Рајли Сејгер
„Преживеаните девојки“ од Рајли Сејгер е многу впечатлив и мистериозен роман, кој нуди вртоглава приказна што успева да го држи читателот во неизвесност од првата страница. Романот детално истражува студен настан што го преживеале три жени, уште наречени и „преживеаните девојки“, кои чудесно преживеале во посебни ужасни масакри.
Самата приказна го следи животот на Квинси Карпентер, последната преживеана девојка. Квинси успешно се обидува да го обнови својот живот по шокот којшто го доживела, но минатото брзо се враќа кога првата од трите преживеани девојки е пронајдена мртва во својот дом. Од самиот почеток, нејзиниот лик е дефиниран со траумата што ја преживеала. Нејзините искуства ѝ оставаат длабоки лузни, и физички и емотивно, и таа се бори да се справи со последиците. Во текот на книгата, проблемите на Квинси се зголемуваат додека таа се заплеткува во нов бран мистерии. Како што навлегува подлабоко во своите истраги, Квинси почнува да сфаќа дека вистината можеби е сосема поразлична од она што таа првично го замислила.
Една од силните страни на книгата лежи во нејзиното истражување на личните демони на Квинси. Сејгер толку добро навлегува во нејзината борба со губењето на меморија и заматените линии помеѓу реалноста и имагинацијата, што како читател ве тера да се обидете да дешифрирате што е реално, а што е плод на скршениот ум на Квинси.
Начинот на кој Сејгер ги подредува настаните, комбинирајќи ја сегашноста со вечерта на масакрот, плетејќи мрежа од мистерија, неизвесност и неочекувани пресврти, овозможува читателот само да претпоставува што ќе се случи следно. Темпото на приказната е директно и секое поглавје завршува непредвидливо што ве принудува да продолжите да читате.
Она што според мене го издвојува „Преживеаните девојки“ е неговата способност да ги поништи очекувањата. Токму во моментот кога мислите дека сте сфатиле сè, Сејгер прави изненадувачки пресврти што ги поништуваат вашите претпоставки.
Генерално, делото е задолжително за сите љубители на психолошки трилери. Со него Рајли Сејтер уште еднаш докажува дека е мајстор на својот жанр, пренесувајќи застрашувачки и зависен роман кој ќе ве прогонува долго откако ќе ја свртите последната страница.
Пишува: Симона Јовеска 
