Елена Конеска, маркетинг и односи со јавноста
Елена Конеска е нов член на нашиот тим. Во продолжение проследете ги нејзините омилени наслови од „Антолог“.
- Сфинга на гневот – Жарко Кујунџиски
Многумина ќе речат, ова е Кујунџиски каков што не го познаваме. Јас ќе речам ваков мегароман ѝ требаше на нашата современа книжевност. „Најдобриот ракопис што кога било си го држел во раце.“
- Авијатичарот – Евгениј Водолазкин
По „Лавр“, ова, според мене, е уште поголемо книжевно остварување на Водолазкин. Како би било да си млад кога треба да остариш? Раскошно раскажана приказна што спојува две времиња преку еден единствен лик.
- Невидлива жена – Славенка Дракулиќ
Приказни за староста и видливоста, или пак невидливоста. За тоа што значи живот во третата доба. Славенка Дракулиќ без задршка зборува за релациите родители – деца и отворено пишува за појавите што го придружуваат процесот на стареење.
- Модар накит – Катарина Винклер
Брутално, искрено, сурово. Книга што не ве остава рамнодушни. И не е ова уште еден роман за семејно насилство. Ова е искрено сведоштво од животот што секој ден се случува и се повторува овде, таму, секаде на земјава.
- Совршената дадилка – Лејла Слимани
Колку добро може да го познавате пријателот, блискиот и дали злото ни е многу поблиску отколку што сме свесни? Психолошки трилер што ќе ве потресе.
