Кон „Крикот на ластовицата“ од Ахмет Умит
Што ли е пеколот ако не свет со изгубена совест?
Пеколното жешко време им пречи на жителите на Истанбул. Меѓутоа, времето ќе им стане најмал проблем кога ќе пронајдат мртво тело што е убиено со познат ритуал. Ритуалот на серискиот убиец Мижачот. Неговата цел се педофилите, ги убива со еден куршум, им сече дел од увото, очите им ги врзува со црвено кадифе, ги носи на места поврзани со деца и притоа остава детска играчка покрај нивните нозе. Но тој убивал во 2012 година, можно ли е по толку време повторно да се вратил? И зошто жртвата е педофилот што пред неколку години се обидел да ја злоупотреби ќерката на началникот Невзат? Сметаат дека овој пат ќе го фатат Мижачот, но случајот станува сѐ посложен и позбунувачки…
Книгата е задолжително четиво за љубителите на трилери. Ова ми е прва книга од Ахмет Умит, но дефинитивно не последна. Има прекрасен стил на пишување што заведува со едноставноста и истовремено топлината на зборовите. Нѐ води низ улиците на Истанбул заедно со началникот Невзат и нѐ принудува да го решиме случајот заедно со тимот. Многу ми се допадна што приказната те тера да го активираш мозокот и да внимаваш на сите детали со цел да го откриеш убиецот.
Како што пишува и на самата корица, во книгата се поставува едно прашање што ќе наиде на многу различни мислења. Дали е поопасен сериски убиец на педофили или пак човек што е сведок на тие убиства и е рамнодушен сѐ додека не го допира него? Ахмет многу убаво ја има вметнато оваа тема во трилерот. На моменти не ќе можете да го разликувате доброто од злото. Што презема полицијата во врска со човековата злоба, каде почнува законот и дали воопшто има крај? Да, човековата злоба. Таа никогаш нема да престане и секојпат ќе нѐ запрепастува со својата безграничност. Не барајте ги демоните во пеколот, тие се меѓу нас. Живеат блиску до нас и чекаат погоден момент да си ги покажат вистинските лица. Педофилија, трговија со ограни, имигранти… сите овие теми се актуелни и денес, но прашањето е: како да го прекинеме тоа страдање? Дали воопшто можеме?
Насловот, корицата, преводот… сѐ е убаво скоцкано, само чека на вистинскиот читател да ја отвори книгата, да нурне под површината и да ги открие сите поуки што таа ги дава. Навистина уживав во книгата, трилер во вистинската смисла на зборот. Заразен и напнат трилер што не се испушта од раце.
За крај, прочитајте неколку цитати од книгата што ми го привлекоа вниманието.
„Моментот кога сме свесни за своето его е моментот кога се наоѓаме во канџите на болката.“
„Овој свет е брутален, и за луѓето и за кучињата, ако не се спротивставите, ќе ви го земат лебот од рака.“
„Најсрамна од сите подлости е политичката подлост.“
„Умерената љубомора може да ја оживее врската, но прекумерната љубомора може да ја оштети почитта.“
„Љубовта е најголемото богатство во светот, но, ако не ѝ се посветиш колку што е потребно, ќе исчезне како фатаморгана.“
Пишува: Андриана Ристевска
