Доба на кожата – пишувањето како форма на отпор

 

 

Контроверзна, дрска, бунтовна, Дубравка Угрешиќ повторно ја имаме во превод на македонски во збирката есеи што наскоро излегува во издание на „Антолог“ – „Доба на кожата“.

Може ли кожата да послужи како уметничко дело, што се случува со доселениците на Запад, каква е улогата на уметноста и на книжевноста и како тоа темата за чистиот хрватски воздух секогаш е актуелна?
Со горчлив хумор и многу културолошки референции, секогаш покажувајќи ги сите лица на најопасното животно на светот – човекот – Угрешиќ се обидува да го сфати денешниот свет и ги преиспитува своите и нашите соништа, среќата и стравовите.

„Моќниот пазар (кој не само што владее со културата на нашето време туку и е културата на нашето време) го пацифизира секој уметнички отпор, правејќи го тоа со сè, па така и со руската авангарда (и со европскиот модернизам). Пазарот ја пацифизира културата на авангардниот отпор, комерцијализирајќи го, исто како што ги искомерцијализира Сталин и сталинизмот. Така егзекуторот и неговите жртви се најдоа на иста тезга, во иста кошница, така патем се изгубија разликите, така се избришани идеите за уметнички отпор, за самата динамика на уметноста, за соборување на зацврстените форми со паробродот на современоста, за преземање личен ризик, за уметноста како воскресение на зборот, за уметноста како очудување, за уметноста како револуција, за уметноста што ќе биде порој врз општествениот вкус, која ќе го промени светот, инаку нема да ја биде“, пишува Угрешиќ.

А преку отпорот, изразувајќи го во формата што најдобро ја владее – пишувањето, Дубравка Угрешиќ не само што ја детектира состојбата туку и ни дава надеж дека е отпорот можен, дека е единствениот начин да се остане здрав во морето од лудило.