Рецензија од прв читател: Перица за „Манипулант“

 

Како што имам напоменато и претходно, Јуси е еден од оние специфични автори кои пишуваат трилери со добра приказна, солидно поткована со некоја паралелна приказна од минатото.

И во овој, шести дел од серијалот, тој ни раскажува паралелно две приказни. Првата е со добро познатиот детектив Карл Морк којшто добива повик да преземе случај на еден остров при што тој одбива. Но по кратко време дознава дека полицаецот што му се јавил се самоубил и оставил траги за него, па немајќи друг избор, Карл и неговата добро позната екипа се фаќаат за работа. Се работи за случајот за Алберта, девојка која пред скоро дваесет години е удрена со автомобил и е пронајдена како виси од некое дрво во близина на несреќата и сè уште не е најден оној којшто ѝ го направил тоа. Полицаецот што се самоубил го посветил својот живот за да открие што се случило со Алберта, при што попатно го загубил семејството.

Втората приказна ни раскажува за еден култ и за жена којашто е приврзана за водачот толку многу што во моментот кога почуствува опасност дека местото може да ѝ биде заземено, ќе направи такво нешто, што е спротивно на сите верувања и убедувања на култот, но како што вели таа, целта ги оправдува постапките.

Навидум, овие две приказни не се поврзани, но некаде на средината, сè почнува да си добива смисла и приказните се испреплетуваат до најситен детал и толку се усовршуваат што на крај имаме неверојатен расплет на приказната.

И овде ги имаме незаборавните Роуз, паметната и организирана помошничка на Карл, и Асад со своите грешавања на зборовите кои што доаѓаат како пикантен зачин на целата приказна.

Јуси ни дава прилика да се запознаеме со еден манипулатор каков што досега не сме запознале и ни прикажува колку некои луѓе можат да бидат безмилосни и да не бираат средства со кои би дошле до целта па по цена и на човечки живот.

Препорака за љубителите на Јуси Адлер Олсен и неговите книги.

Пишува: Перица Илиевски