Марта Димитров: Oсобините на ликовите од моите книги се украдени од реални личности
1. Покрај тоа што вашата книга доживеа ново издание, какви други успеси ви има донесено во периодот од првото издание досега?
Верувам дека за авторот нема поголем успех и радост од задоволни читатели до кои авторот допрел на начин на којшто имал намера тоа да го направи. Повремено ми се случува да прочитам убави (веројатно и искрени) коментари за Шардоне и шпагети карбонара и во тие моменти сфаќам што и колку всушност сум постигнала конкретно со таа книга.
2. Како сте задоволни од вашата соработка со „Антолог“ и колку сметате дека соработката со одредена издавачка куќа е важна за успехот на едно дело?
„Антолог“ особено посветува внимание на македонските автори што ми е драго и притоа не ги реди само нивните книги на полиците, туку внимава и на другите аспекти од таа врска издавач-автор. Секако тоа е од огромна важност не само за делото, туку и за авторите кои се обидуваат да си го трасираат патот до успехот кои се обидуваат да најдат своја публика.
3. Дали моментално пишувате и што ново да очекуваме од вас во блиска (или далечна :)) иднина?
Секогаш пишувам нешто, иако за жал (или за среќа :)) не секогаш тоа нешто станува една целина која ќе помине низ процесот на издавање. Она што моментално ми е во подготовка и уште малку, се надевам, целина, е наменето за помлада публика. Сепак повеќе би открила откако ќе се заокружи таа целина.
4. Дали имате омилен лик од вашите книги и дали би можеле да го поминете животот во негово друштво (таков каков што сте го створиле)?
Она што е карактеристично за ликовите од моите книги е дека нивните особини се всушност украдени од реални личности, при што не мора целосно да одговараат на некој од реалноста туку обично се мешавна од карактери. Ова на некој начин значи дека моите ликови всушност ги познавам. Но, еве, во она што сега го подготвувам, можам да кажам дека има таков лик кој би сакала да го запознаам, кој сега би било рано да го откријам.
5. Некои велат дека добар писател е 90% добар читател. Дали се согласувате со оваа изјава и доколку е така, кои автори имале најголемо влијание врз вас како писател?
Апсолутно се согласувам. Јас ја знам онаа „Прочитај многу книги и твојата ќе потече како река“, но како и да е, верувам дека за да се пишува треба да се има добра подлога од прочитани книги. Сигурно има повеќе книги врз кој сум го градела својот стил, но како име можам да го спомнам Достоевски кој ми создаде желба да навлегувам подлабоко во психологијата на ликовите кога пишувам.
6. Што сте кога не сте писател/ка?
Зад таа да речам, титула, јас сум сум обичен човек што оди на работа, поминува време со саканите, готви, итн. Пишувањето повеќе го сфаќам како своја мисија и тоа е целосно испреплетено со моето битисување, но именката писателка никогаш не ми била цел.
7. Овој разговор е во склоп на акцијата ЛЕТО СО МАКЕДОНСКИ АВТОРИ која трае од 11 до 22 јули. Нашата заедничка цел есекој читател во својот список „книги за наодмор“ да вклучи и дела од македонски писатели. Но која книга вие би им ја препорачале на нашите и ваши читатели да ја понесат со себе ова лето?
Тука нема да бидам скромна и ќе ја препорачам Шардоне и шпагети карбоната затоа што како романса може да биде одлична за летниот период. Дури и дејството во книгата се случува во лето.
