Рецензија од прв читател: Катерина за „Сите лета потоа“ од Карли Форчан

 

Шест лета за вљубување – еден миг за разделба. И еден викенд за исправка.

Доколку ви се чита приказна богата со фантастично разработени ликови, емотивно евокативна, со одлична и лесна нарација – ова е вистинската книга за вас. „Сите лета потоа“ е современа романса (воедно и дебитантски роман од Карли Форчан). Во книгата се опфатени теми поврзани со љубов и пријателство, семејство, анксиозност и панични напади, грешки од минатото и скршени срца, загуба, но и простување и давање втори шанси.

Во период од шест лета, Сем и Перси беа нераздвојни пријатели. А потоа, започнале да градат нешто повеќе. Но, веќе дванаесет години ниту се виделе ниту се слушнале. Благодарение на една „грешка“ од минатото, која до ден денес ја прогонува Перси.

Наместо топлите лета да ги поминува покрај езерото во Берис Беј (каде што и пораснала), Перси ги поминува во градот, во својот модерен стан, излегувајќи со пријателите и држејќи ги сите на безбедно растојание од своето срце.

Сѐ додека не прими повик што ќе ја натера да се врати таму, кај човекот за кого мислеше дека никогаш повеќе нема да го види – но и единствениот кој некогаш го сакала.

Перси прима повик од братот на Сем, Чарли, кој ѝ соопштува дека нивната мајка по долги години боледување починала. Враќањето на Перси во Берис Беј е нешто за коешто не помислила дека некогаш повторно ќе го стори, но судбината диктира поинаку. Нејзиното враќање води до отворање прашања и проблеми од минатото. Минато, со кое таа не е подготвена да се соочи.

Авторката толку добро ги објаснува одговорите на тие прашања, исто како сѐ тоа да се одвива пред ваши очи. Нејзините зборови се вткаени убаво и болно, но нема да останете рамнодушни и ќе избрзате со вртењето страници, додека да стигнете до самиот крај.

Ова е приказна што ќе ве потсети зошто секој избор, секоја одлука може да ве доведе до различен живот. Карли Форчан на еден невообичаен начин отсликува зошто и како Сем и Перси се заљубиле еден во друг, но и зошто се разделиле. Како читатели, ќе ги разберете сите причини кои довеле до оваа ситуација. Ќе бидете тажни кога и тие ќе бидат. Ќе се смеете кога и тие ќе се смеат. Ќе чувствувате болка кога и тие чувствуваат. И тоа само докажува колку добар автор е Карли Форчан.

 

Пишува: Катерина Павловска