Константин Дораковски (1949), дипломат и писател, службувал во повеќе дипломатско-конзуларани претставништва (Чикаго, Торонто, Канбера, Отава). Бил прв висок дипломатски претставник на Република Македонија во Канада и во Австралија.

Во литературата најпрво се посветил на драмското творештво. Дебитирал со текстот Шушулеменко (1972), фарса за феноменот на власта и на владеењето, подготвуван во Драмски театар – Скопје. Одржана е само претпремиерна изведба, но поради партискиот притисок при пресметката со појавата на либерализмот во тогашна Југославија, делото не заживува на сцена.

Во романот Тритебреганадушата (1995) ја следи судбината на нашиот човек во првите децении на дваесеттиот век, кој е само обичен објект на интересите на посилните во завладувањето на македонските простори.

Сепак, драмата и театарот му претставуват долгогодишна преокупација и во подолг временски период создава уште неколку драмски текстови, кои ги публикува во 2017 година.

Новиот ракопис на Птоломеј (2005),текст насочен кон театарот на суровоста, задира во некои погледи на нашата средина во себенаоѓање на идентитетските корени во далечното минато, со видувања за влијанијата кои ја издигаат некоја историска личност на пиедесталот на историската големина.

Драмскиот текст Додека сонцето изгрее на запад (2016) го пренесува секојдневието, надежите на обичниот човек во предвечерието на распадот на СФРЈ и рефлексиите од некои минати времиња во кои се создавала македонската држава, а што оставиле контроверзии и длабоки траги во свеста, меморијата и во меѓусебните односи на поедини учесници.

Во романот Златниот часовник што го запре времето (2018) живописно се испреплетува интересна приказна за детството и за младешките години поминати во опкружувањето на средината каде што израснал авторот, а со отсликувањето и на настани и на ликови од бурните времиња на претходните генерации, како и со средбите и контактите во далечните прекуокеански простори, се збогатува наративот што опфаќа стотина години (1903-2003). Така, спокојството во страниците посветени на секојдневието на неговата непосредна околина во детството и во младешките години се пресликува и низ турбулентните периоди за времињата низ кои одминуваат животните патишта на повеќе ликови, а со прекуокеанските хоризонти се заокружуваат сеќавањата кои ги запрел „златниот часовник“.

Најновиот роман е Белешки од далечниот север (2022).