Авторот на „Невидлив“ во обид да го сруши светскиот рекорд за најмногу потпишани книги!
Шпанскиот автор Елој Морено месецов ќе направи обид да го сруши Гинисовиот рекорд за најмногу потпишани книги.Авторот на „Невидлив“ ќе организира вистински книжевен спектакл за сите љубители на неговите дела, заедно со поддршка на локални и интернационални издавачи.
На 8 февруари, Мадрид ќе биде центарот на рекордното авторско потпишување кое ќе се одвива на плоштадот „Калао“. За да се постигне посакуваната цел, авторот треба да потпише 7 000 примероци од своите книги за 12 часа и со тоа да го урне претходно поставениот рекорд кој брои 6 904 потпишани книги. Самиот настан е осмислен како прослава за литературата и за пишаниот збор.
Љубителите на книгите на Морено, но и оние кои се љубопитни, ќе може да си договорат термин за потпис на книга, да си купат книги на самиот настан и да се подружат со други истомисленици кои дошле да го поддржат авторот. Интересно за ова потпишување е тоа што читателите може да донесат и веќе потпишани книги од авторот.
Потпишаните примероци авторот ќе ги потпише пак, а книгите ќе добијат и посебен комеморативен печат. Како што пишува во поканата за самиот настан: „Ќе има многу книги, подароци и изненадувања! Сите се добредојдени на плоштадот Калао. Можете да донесете неограничен број книги од авторот, од секој негов наслов. На самиот настан ќе има инфо-центар и продажно место каде ќе може да се купат книгите од авторот. Доколку книгите се веќе потпишани, добредојдени сте да ги донесете на потпис пак со тоа што книгите ќе добијат и комеморативен печат. Сè што треба да направите е да напоменете дека ќе носите и потпишани примероци во пријавата за настанот. “Ова е само уште еден настан кој ја краси литературната кариера на авторот.
Елој Морено своето патување како писател го има започнато во 2010-та година. Уште со првите неколку дела остварува поврзаност со публиката. Со истрајност и многу креативност го издава и делото „Невидлив“, кое станува огромен хит кај публиката. Минатата година излезе и сериска адапција на делото во продукција на Дизни.
