„Антолог“ ја објави книгата „Мрежи“ од Елој Морено
Емотивна, трогателна, модерна, поинаква приказна
20 јули 2026
Издавачката куќа Антолог од Скопје со големо задоволство соопштува дека во рамките на проектот ЕУрека: Читањето – семе на иднината! ја објави книгата:
„МРЕЖИ“ ОД ЕЛОЈ МОРЕНО
Ве известуваме дека е објавен македонскиот превод на романот „Мрежи“ од новата ѕвезда на шпанската литература, Елој Морено, во превод на македонски јазик на Виолета Јагев. „Мрежи“ е повик за размислување за улогата на дигиталната технологија во нашиот живот и покана за повторно поврзување со тоа што е навистина важно: личните односи, емпатијата, реалноста.
„Мрежи“, низ очите на една тинејџерка, ни раскажува за дигиталниот свет што го одзема поголемиот дел од времето на младите, но и на возрасните луѓе. Приказна за една љубов и приказ на зависноста од социјалните медиуми и нивните потенцијални опасности.
Девојка со часови ги гледа прекрасните патувања, совршените тела и аутфитите што ги прикажуваат инфлуенсерите. И несреќна е бидејќи не може да води животот како од онлајн-светот во кој лајковите ја одредуваат среќата, а филтрите ја искривуваат реалноста. Во приказната се испреплетуваат судбините на неколку тинејџери, заробени во пајаковата мрежа на социјалните мрежи.
Романот е своевидно продолжение на „Невидлив“, кој од неодамна стана дел од дополнителната литература во средните училишта и во нашата држава. Во Шпанија и во други земји таа одамна е задолжителна или препорачана лектира во многу основни и средни училишта, бидејќи се користи како алатка за разговор за врсничкото насилство, емпатијата и менталното здравје. Според неа вов 2024 година е снимена и мини-серија од 6 епизоди која е достапна на Disney+.
Книгата на македонски јазик е објавена со поддршка на програмата Циркулација на европски книжевни дела во склоп на Креативна Европа на Европската Унија – Потпрограма „Култура“ и на Министерствата за култура на РС Македонија. Романот е достапен во книжарниците и преку дистрибутивната мрежа на издавачот.
За авторот: Елој Морено (1976) е шпански писател. Студирал компјутерски менаџмент и работел како информатичар. Поради големата љубов кон книжевноста својот прв роман го објавил самостојно и го продал во повеќе од 200 000 примероци. Подоцна објавува уште неколку романи, од кој најпознат е „Невидлив“ (2018), едно од најчитаните современи дела на шпански јазик. Морено е препознатлив по работилниците за креативно пишување и по активната комуникација со своите читатели. На 8 февруари 2025 година го соборил Гинисовиот рекорд за најмногу книги потпишани во рок од дванаесет часа – потпишал 11 088 примероци!
За преведувачката: Виолета Јагев (1953) е дипломиран инженер технолог и преведувач од шпански јазик. Живеела во Перу седумнаесет години, каде што завршила основно и средно образование како и првите две години на Факултетот за петрохемија. Дипломирала на Технолошкиот факултет при Универзитетот „Св. Кирил и Методиј“ во Скопје. Дополнително се школувала и работела на компјутерска обработка на податоци. Со преведување се занимава од 1979 година и има над педесет книжевни преводи, пред сè од шпански јазик. Добитник е на наградата за превод „Ванѓа Чашуле“ во 2012 година, и на наградата „Кирил Пејчиновиќ“ за преведувачки опус во 2017 година на Советот на Меѓународната средба на книжевните преведувачи.
#ЕУрека #читањетосеменаиднината #EUrekaseedandread #EUreka #EUrekauthors #EUrekatranslators #EUrekaillustrators #TranslatorsOnTheCover #creativeeurope4books #creativeeurope
„ЕУрека: Читањето – семе на иднината!“ е книжевен проект кој опфаќа превод, издавање, дистрибуција и промоција на висококвалитетни книжевни дела, со посебен фокус на помалку користени европски јазици, жанровска разновидност, како и современи, ангажирани авторски гласови. Проектот е целосно усогласен со приоритетите на Европската Унија за културна разновидност, инклузија, родова еднаквост, еколошка свест, дигитализација и зелен развој, при што поврзаноста со природата е клучна концептуална и програмска оска.
Ние сме сериозно свесни за суровите предизвици пред кои се исправени планетата и човештвото и поради тоа „Антолог“ ја лансира „Се грижиме за планетата“, агенда за одговорно однесување кон природата и заедницата и со објавување на секоја нова книга, опфаќаме конкретни мерки и активности за еколошко, одржливо, етичко и социјално одговорно однесување.
Повеќе на: https://antolog.mk/se-grizhime-za-planetata/
Следете нè на:
АНТОЛОГ – Книжевен центар
antolog_mk
Youtube
https://www.youtube.com/channel/UCPMeZZYy8_NAAGJ4bUR3OeA
Контакт Aнтолог
e-mail: valentina.antolog@gmail.com
ул. „Ѓорѓи Пулевски“ 29 лок. 1
Скопје
тел. / факс 3201-007
