Агапи Гордон е синоним за пријателство кое поттикнато од кратко патување успеа да креира една животна уметност.

Водејќи се низ животот, се обидува да сподели верување дека секогаш треба да се пружи шанса на оној со кого животот ве споил по многу години на неверојатно интересен, а толку ненаметлив начин и кога сфаќате дека може да сте многу различни, но реализираноста во професијата и зрелоста како личност да ве направат да бидете комплементарни и да се надополнувате.

Агапи Гордон е пример дека ако сте доволно креативни и неоптоварени со себепромоција, ако го сакате животот, ако верувате во љубовта, ја почитувате искреноста, го сакате пријателството, тогаш тој неверојатен спој може да резултира со успешен книжевен израз.

Агапи Гордон преку пишување на оваа книга проникна длабоко во себе и препозна некои сопствени способности и вештини за кои не верувал дека постојат.

За Агапи Гордон е својствена истрајноста во реализирањето на долгогодишната идеја сите белешки од животот, сите животни беспаќа, испреплетени животни искуства, убави и помалку убави случки, длабоките и искрени емоции да се преточат во прозно дело кое се чита во еден здив затоа што во секој негов збор се содржани многу животни приказни, приказни коишто може да му се случат секому.

Со оваа книга, Агапи Гордон упатува совет до секого да се сврти прво кон себе, да се запознае себе си, да биде искрен во емоциите, да се почитува, да биде претпазлив со чувствата, му нуди различни поуки, различни ставови, различни мислења, но со една заедничка цел – како да живееме посреќно, како да видиме каде грешиме и да се поправиме, како да имаме поубав живот и да уживаме во него.

Агапи Гордон, ова свое патување, оваа своја приказна, во која ужива со секој свој здив, ќе ги продолжи со делата кои допрва доаѓаат…