Авторот на „Невидлив“ е новиот светски Гинисов рекордер за најмногу потпишани книги!

Шпанскиот автор Елој Морено е новиот Гинисов рекордер за најмногу потпишани книги. Авторот потпишал 11 088 книги во рок од 12 часа, уривајќи го претходно поставениот рекорд, кој брои 6 904 потпишани книги.

За оваа цел, авторот на 8-ми февруари во Мадрид направи една сеопфатна книжевна дружба. На настанот, сите читатели на Морено, како и љубопитните посетители, можеа да си договорат термин за потпис на книга, да си купат книги на самиот настан и да се подружат со други истомисленици кои дошле да го поддржат авторот.

Иако за титулата беа потребни само 7 000 пoтпишани примероци, авторот на „Невидлив“ својот книжевен спектакл го заврши со 11 088 потпишани книги. Меѓу потпишаните книги имаше нови примероци од делата на авторот, како и примероци кои тој веќе ги потпишал, но за оваа прилика ги потпишал пак, па овие книги добија и специјален комеморативен печат.

Новиот Гинисов рекорд за најмногу потпишани книги доаѓа по дури скоро десет години од претходно поставениот. Во 2016, индискиот автор Викрант Махаџан потпишал 6 904 книги во рок од 12 часа и бил последниот кој го имал овој Гинисов рекорд.

Посетителите на настанот задоволно тврдеа дека ова е супер прилика да се подружат со други читатели, но и да го видат авторот одблизу. Локалните медиуми кои известуваа за настанот споделуваа дека авторот постојано имал насмевка на лицето – и задоволно пишувал и зборувал со читателите цели 12 часа.

Сведоци сме на уште еден импресивен момент во авторската кариера на Морено. Момент кој дефинитивно отвора нови идеи за книжевни дружби помеѓу читателите и авторите.