Денис Бојаров: Добар писател е релативен поим, особено во денешно време
1.Покрај тоа што вашата книга доживеа ново издание, какви други успеси ви има донесено во периодот од првото издание досега?
По излегувањето на првото издание, „Нека играат децата“ ја доби наградата „Книга на годината“ на меѓународната литературна манифестација „Литератопија“ 2020. За време на второто издание, еден дел од расказот „Убавиот збор железни врати отвора“ од оваа книга одненадеж се најде во учебникот по Македонски јазик за 4 одд., за кое бевме изненадени и јас, и Антолог. Се радувам што книгата се чита и понатаму и што добива убав прием кај читателите, особено кај родителите. Тоа го потврдуваат убавите оценки на платформата Гудридс, како и освртите по книжевните групи на Фејсбук и пораките што ги добивам на социјалните мрежи и на мејл.
2. Како сте задоволни од вашата соработка со „Антолог“ и колку сметате дека соработката со одредена издавачка куќа е важна за успехот на едно дело?
Задоволен сум. Антолог направија сè што може да се направи за промоција, маркетинг и продажба на една книга. Соработката со издавачка куќа значи онолку колку што значи и предавањето на вашето дете во одредена градинка. Секој го сака најдоброто за своето дете, па така и јас моето првенче го доверив во рацете на вистинските луѓе. На професионалци со големо искуство во оваа област. Зар новото, четврто издание не го потврдува токму тоа?
3. Дали моментално пишувате и што ново да очекуваме од вас во блиска (или далечна :)) иднина?
Моментално не пишувам затоа што немам време, желба и инспирација. Имам почнато роман од пред две години, но коцките сè уште не се подредени за да го добие конечниот израз. Кога ќе можам да се дадам себеси целосно како што се дадов за „Нека играат децата“, тогаш ќе продолжам со пишување. Дотогаш ќе читам убави книги.
4. Дали имате омилен лик од вашите книги и дали би можеле да го поминете животот во негово друштво (таков каков што сте го створиле)?
Со оглед на тоа дека мојата книга е збирка од 51 расказ, кај мене ликовите се премногу и навистина ми е тешко да се одлучам за еден или неколку од нив. Сите ми се драги на свој, поинаков начин. Тоа ми е речиси исто како да прашате родител: „Кое дете си го сакаш најмногу од сите пет?“
5. Некои велат дека добар писател е 90% добар читател. Дали се согласувате со оваа изјава и доколку е така, кои автори имале најголемо влијание врз вас како писател?
Добар писател е релативен поим, особено во денешно време, каде што добрите писатели се сведени на тоа колку копии имаат продадено од своите книги, а не колку и какви награди имаат добиено, на колку јазици се преведени и какви книжевни критики имаат добиено. Да, добрите писатели, пред сè, читаат. Читам и јас. Веројатно секој од нив ми оставил по некој книжевен белег, некоја добра размисла или зашеметувачки стил на пишување. Којзнае… Тоа читателите најдобро го забележуваат.
6. Што сте кога не сте писател/ка?
Во последните две години јас сум првенствено книжар, потоа професор, преведувач, лектор, и цел живот домаќин. Татко сум на 8-годишното маче по име Карма, другар на многумина, пријател на неколкумина. Којзнае уште што сум… Треба да размислам. Добро и опсежно прашање.
7. Овој разговор е во склоп на акцијата ЛЕТО СО МАКЕДОНСКИ АВТОРИ која трае од 11 до 22 јули. Нашата заедничка цел е секој читател во својот список „книги за на одмор“ да вклучи и дела од македонски писатели. Но која книга вие би им ја препорачале на нашите и ваши читатели да ја понесат со себе ова лето?
Антолог има шаренило од македонски автори од различни жанрови. Нека си понесат што им лежи на душа.
