Ели Костова, продажба – Книжарница Антолог Центар
„Возот за Самарканд“ од Гузел Јахина: Како љубител на историја, моја препорака е овој прекрасен, но истовремено суров роман кој го прочитав во еден здив. Гладта во комбинација со бездомништвото и епидемијата ги прикажува условите и животот на 500 деца во возот за Самарканд во една прилично темна дамка во руската историја, но воедно и луѓето кои се борат за преживувањето на овие деца. Добрината на луѓето ќе ви ја развесели душата во најтешките мигови од романот.
„Егото е непријател“ од Рајан Холидеј: Низ спектар приказни и примери од литературата, филозофијата и историјата, Рајан Холидеј го прикажува егото како нашиот најголем непријател. Романот ме натера да се преиспитам себеси за тоа колку моето его ми е непријател и како да излезам победнички во таа битка. Книгата изобилува со поучни приказни и примери на важни личности од литературата, па сè до историјата. Го прикажува егото како наш најголем непријател и читајќи ја книгата се соочив со сопственото и ја препорачувам на секој којшто сака да го направи тоа.
„Деца на злото“ од Миодраг Мајиќ: Приказна за драматично убиство на познат политичар. Потрагата по убиецот нè воведува во свет полн со злосторства на страст, одмазда и предупредување. Никола Бобиќ станува адвокат на обвинетиот, а како што напредува истрагата, тој влегува во опасна игра која засекогаш ќе му го промени животот. Непредвидлива и зачудувачки реална се зборовите со кои би ги искористила да го опишам овој прекрасен роман. Правосудниот систем, политиката и сплетот на околности заедно со балкански шмек и информацијата дека е базирана на вистински случувања беа добитната комбинација која ме привлече од самиот почеток. Книга која ќе ве натера да ја читате во еден здив. 
„Само таа остана“ од Рајли Сејгер: Луѓето кои ја бараат вистината, бидејќи вистината има повеќе страни, ќе уживаат во овој исто така прекрасен роман. Ленора која е нема, парализирана и седи врзана за инвалидска количка ја раскажува својата страна на приказната за масакарот на нејзиното семејство со помош на дактилографска машина од нејзината нова негувателка Кит. Роман кој ќе ве остави во неизвесност до самиот крај.
„Процес“ од Франц Кафка: Процес е едно од најважните книжевни дела на XX век со борба за вина и невиност на обичниот човек во еден необјаснив процес пред државата и правосудниот систем. Надреален кошмар во реалноста и преиспитување за сопствениот живот и битие. „Процес“ никогаш не е завршен, иако содржи поглавје каде што приказната намерно доведува до крај. Интересна приказна која ќе ве замисли што би направиле вие во еден таков „процес“.
