КАМИЛА ЛЕКБЕРГ И ХЕНРИК ФЕКСЕУС: ЕКСКЛУЗИВНО ИНТЕРВЈУ ЗА АНТОЛОГ
- (За Хенрик) Македонските читатели ја знаат Камила од некои нејзини стенд-алоун книги, но за Хенрик ретко кој слушнал. Може ли да ни кажеш нешто повеќе за себе?
Јас сум менталист и експерт за говор на тело и комуникација. Често сум на сцената, како предавач или менталист, и имам турнеја со новo „менталистичко“ шоу оваа есен. Јас сум и автор, и на нефикција и на фикција. Мојата најголема нефикциска книга е „Уметноста на читање умови“, која е продадена во над 1 милион примероци низ светот. Во светот на фикцијата ја напишав трилогијата „Менталист“ заедно со Камила, трилогија за млади (Young Adult) и сега мојот нов проект: серијал полн неизвесност чија прва книга го носи насловот „Жртвата“.
- Како настана трилогијата „Менталист“? Која беше инспирацијата зад тоа?
Бевме во селската куќа на Камила и Хенрик почна да зборува за идејата што ја имаше. Камила веднаш почна да ги пополнува празнините и придонесе за приказната. Разбравме дека тоа треба да го направиме заедно, ни требаше вештина на Камила како автор на крими-романи и менталистичкиот ум на Хенрик. И мислиме дека испадна прилично добро.
- Дали би можеле да го опишете процесот на пишување? Дали едниот од вас пишуваше додека другиот читаше и даваше повратни информации или двајцата седевте и пишувавте заедно?
Се среќававме, често кај Камила (Камила во пижама со мачка пред телевизорот, Хенрик свртен со грб кон телевизорот) и таму разговаравме за претстојните сцени и што ќе се случи. Потоа ги поделивме поглавјата, секој од нас отиде дома да пишува и потоа ги заменивме текстовите. Пишувавме и преправавме повеќе пати, па сега на крајот не сме ни сигурни кој што напишал.
- Главните ликови во трилогијата се менталистот Винсент и полицискиот инспектор Мина. Дали ти, Камила, се фокусираше на пишување сцени во кои е вклучена Миа, додека Хенрик се фокусираше на Винсент?
Всушност не. Не сакавме да го правиме тоа, па напишавме сè заедно.
- (За Камила) Камила, како беше преминот од самостојно пишување книги во пишување како дуо? Кои беа предизвиците и предностите?
Бев многу нервозна!! Беше навистина страшно, бидејќи не знаевме како ќе помине. Но, претходно си ветивме дека нашето пријателство е поважно од пишувањето, па во случај да не успее, ќе престанеме. За среќа помина подобро отколку што некогаш можев да замислам!
- Која е најголемата разлика помеѓу пишувањето фикција и нефикција, врз основа на вашите искуства?
Хенрик: Со фикцијата имате поголема слобода, не мора да ги следите истите правила и полесно е да направите временски скокови и да ја движите приказната со различно темпо. Смислувањето ликови е одлична забава, да се доживее моментот кога тие почнуваат да имаат свои мисли и работи што им се случуваат. Кога пишувате нефикција, мора да ги почитувате фактите и законите на физиката.
- (За Хенрик) Хенрик, дали Винсент на некој начин се базира на тебе?
Винсент е многу сличен на мене и имаме многу сличности, но мислам и се надевам дека сум барем малку социјално покомпетентен од него.
- (За Камила) Камила, гледаш ли некакви сличности меѓу тебе и Мина?
Можеби некои, но не сме толку слични. На пример, една голема работа за Мина е нејзината гермофобија, тоа влијае на целиот нејзин живот и битие, а јас сум спротивно од тоа. Еден од моите забавни трикови (иако не го правам тоа толку многу по Ковид) е дека можам да излижам во основа сè, дури ни нечиј телефон не ме плаши.
- Надвор од вашите сопствени книги и ликови, кој е вашиот омилен лик од книга и зошто?
Камила: Морам да кажам дека Рут Патчет, од „Животот и љубовта на ѓаволицата“ на Феј Велдон е еден од нив. Оваа книга ми значи толку многу, и како жена и како автор.
Хенрик: Мајрон Болитар од серијалот за Мајрон Болитар на Харлан Кобен.
- Дали добивте понуда за серија или филмска адаптација на трилогијата „Менталист“?
Да, имаме, но филмскиот свет е многу таинствен, па не можеме да кажеме повеќе за тоа…
- Дали имате планови за соработка на друга серија или книга во иднина?
Не во моментов. Ја сакавме нашата соработка и сме многу горди на трилогијата „Менталист“, но моментално работиме на наши проекти. Камила ја лансира третата книга за Феј во мај, а Хенрик ќе ја објави првата книга од сопствениот серијал полн неизвесност во јуни. Се држиме зафатени!
За крајот на ова интервју, каква порака би сакале да им пренесете на вашите фанови во Македонија?
Неизмерно ве цениме, ви благодариме што ги читате нашите книги! Се надеваме дека ви се допаѓаат!
