Перица Илиевски, маркетинг и социјални мрежи

 

Можеби ова ќе звучи пристрасно, но изданијата на „Антолог“ се најдобри. Почнувајќи од кориците, кои се многу битен фактор кога купувам книга, па се до преводот и лектурата. Во продолжение ви издвојувам пет книги, кои мене најмногу ми се допаднаа:

 

 Атомски навики – Џејмс Клир

Атомски навики е книга во која се пронајдов не 100, туку 200%, книга која ме погоди точно во целта, како да била пишувана за мене. Некои од работиве ги знаев и почнав да ги применувам некое време пред да почнам да ја читам книгата и со читањето само си потврдив дека сум на вистински пат, а некои работи ми станаа јасни и ми помогнаа да направам некои сериозни промени. Би сакал топло да му ја препорачам на секој што сака да прочита нешто од овој жанр и на секој кој сака да смени нешто во својот живот, верувајте ќе ви помогне многу.

  Вознемирени луѓе – Фредрик Бакман

Ова е приказна за грабеж на банка и тоа безготовинска т.е. ова е приказна за држење заложници во стан кој се продава. Но ако подобро размислам, ова е приказна за ИДИОТИ. Но што всушност се идиоти? Што го прави еден човек идиот?  Бакман навлегува во приказните на ликовите и ни ги разголува нивните души, ни ги прикажува ликовите од психолошка страна и ни покажува што ги довело во ситуацијата во која се наоѓаат. Топла препорака на сите љубители на добра книга кои сакаат да уживаат во едно уникатно дело. Бакман е незаменлив, жанр сам по себе

  Култ – Камила Лекберг и Хенрик Фексеус

„Култ“ е долгоочекуваното продолжение на „Менталист“, книга за која не можам да кажам дека е едноставно маестрална бидејќи ги надмина сите мои најлуди очекувања. Не можам да најдам зборови за да кажам колку само уникатно е разврзан целиот случај, колку чисто и математички прецизно се одвиваше сè, какво лудо и незаборавно возење ми приреди. И да додадам дека корицата е една од најуникатните и најомилени корици што ги поседувам во мојата библиотека.

  Дар за бурата – Долорес Редондо

„Дар за Бурата“ е завршницата на Бастанската трилогија од Долорес Редондо. Стилот на пишување на Редондо е возбудлив и преубав со живописни описи на Бастан и ритуалите коишто формираат еден добар дел од нивната култура. Толку добро ја везе целата приказна што вклучува крими, хорор елементи придружени со митологија и верување на едно општество и создава напнат роман што не се испушта од раце. И она што многу ретко се среќава кај ваков вид на книги е животот на ликовите, кој Редондо толку реално им го дава што можете да ги замислите, да се соживеете со нив и да се ставите во нивна кожа.

  Тегли – Јордан Коцевски

Ова е нешто што би му го препорачал на секој љубител на трилери, една неверојатно уникатна приказна. И она што го одвојува овој роман од останатите трилери е црниот хумор којшто е многу добро вткаен во целата приказната. Подгответе се да видите како еден сосема „рутински грабеж“ се претвора во борба за сопствениот живот. Книга која нема да ја оставите додека не ја прочитате, од која можеби и ќе се исплашите, но и многу ќе се смеете. Една од најуникатните приказни на македонската книжевна сцена!