Пет библиотеки во Европа кои вреди да се посетат
Љубовта кон книгите не се сведува само на читање, ниту, пак, на следење на занаетот на некој автор. Љубовта кон книгите подразбира и посветеност кон тоа како книгите имаат влијание на физичкиот простор. Токму затоа библиотеките како архитектонски зданија оставаат големи впечатоци кај читателите, не само поради својот изглед туку и заради колекциите на книги кои тие ги чуваат.
Инспирирани од патувања поттикнати од литературата, правиме разглед на 5 библиотеки низ Европа кои вреди да се посетат:
Универзитетската библиотека во Белград, Србија
Како најстара и најголема универзитетска библиотека во Европа, оваа книга е дом на голем број специјалистички книги, но претставува и прекрасно архитектонско издание во центарот на градот. Универзитетката библиотека „Светозар Марковиќ“ е дом на голем број стручна литература достапна до јавноста за полесна пристапност до стручни информации. Велат дека просторот е креативна средина каде се здружуваат љубителите на пишаниот збор и сите оние љубопитни за најразлични теми во општеството. Библиотеката е изградена на почетокот на XX век, а внатрешноста е уредена од страна на германската влада, која по Втората Светска војна донирала мебел.
Австриската национална библиотека, Виена, Австрија
Импозантна градба која покрај своето архитектонско здание и литературна колекција посетителите ги плени и со својот декор. Таа се наоѓа во склоп на Виенската империјална палата – комплекс во кој се наоѓаат уште четири музеи, специјални архиви и колекции. Библиотеката е дом на над 200 000 примероци кои се сместени во различни кабинети и историски полици. Покрај прекрасната колекција на папируси, средовековни скрипти и книги, она што вистински ги зачудува сите посетители е т.н. Големата Хала. Широка скоро 80 метри и висока 30 метри, во центарот има голема купола. Дел од декорот на библиотеката е и прекрасната колоритна фреска на сликарот Даниел Гран.
Градската библиотека во Штудгард, Германија
Веројатно една од најпопуларните библиотеки на социјалните медиуми, градската библиотека во Штудгард e одичен пример за практичност и ефективност кога станува збор за чување на литературата. Често условувана како „минималистичка коцка со светол амбиент“, оваа библиотека го плени љубопитното око на секој посетител. И покрај својот популарен изглед, библиотеката има одлична колекција на книги која освен на германски, достапна е на англиски јазик и на уште неколку други јазици. Покрај убавата колекција на книги, посетителите може да ги разгледаат и уметничките колекции како и филмските збирки или да го посетат кафулето во склоп на библиотеката.
Библиотеката „Јоанина“ во Коимбра, Портуалија
Оваа библиотека се смета за една од најубавите библиотеки во земјата, честопати ословувавна и како најпознатата библиотека во Португалија. Сместена во срцето на унивезитетот „Коимбра“, оваа библиотека не само што претставува вистински спектакл за сите љубопитни туристи и љубители на книги туку е обележана и како национален споменик. Библиотеката е оснавана во 1717-тата година и го носи името по својот основач, португалскиот владетел Жоао V. Од своето основање до денес библиотеката е дом на повеќе од 70 000 пишани дела меѓу кои има уникатни документи, пишани дела со непроценлива вредност, историски важни списи и први изданија од дела. Според турстите кои ја посетиле, библиотеката плени со својата убавина како архитектонско здание, но претставува и еден интересен предизвик за посета доколку сте желни да ја истражите целосно.
Библиотеката „Лаурентијан Медичи“, Фиренца, Италија
Уште една библиотека која сама по себе има вредност и како архитектонско здание и по намената за која служи. Библиотеката „Лаурентијан Медичи“ во Фиренца, Италија е архитектонско здание кое е работено по дизајн на Микеланџело. Ова прекрасно здание е направено по нарачка на семјството Медичи и градбата требало да означува дека тие веќе не се само трговска фамилија, туку дека тие се дел и од културното милје на Фиренца. Сите книги кои и до ден-денес се во сопственост на библиотеката оригинално потекнуваат од приватна библиотека на фамилијата Медичи. Во библиотеката може да се најдат дури 4 500 печатени книги, изработени со првите техники на печатење. Изобилува со средновековни списи и писанија од ренесансниот период. Она што покрај книгите најмногу остава впечаток кај посетителите се просторната соба за читање, како и мермерните скалила на библиотеката.
