ПОКАНА ЗА НАСТАН „АВТОПОРТРЕТ СО СЕДУМ ПРСТИ“

Почитувани,

Фондацијата „Ацо Шопов – Поезија“, издавачката куќа „Антолог“  и едукативниот културен центар „Лабораториум“ имаат чест и задоволство да ги поканат новинарите, репортерите, снимателите и фоторепортерите на вашите редакции на настанот „Автопортрет со седум прсти“ – насловен според штотуку објавената книга на Ацо Шопов  –  кој ќе се одржи утре, вторник 19 март, со почеток во 19 часот, во „Лабораториум“ (Бул. „Климент Охридски“ бр. 68, Скопје).

За книгата ќе говорат проф. д-р Владимир Мартиновски, декан на Филолошкиот факултет „Блаже Конески“, и Јасмина Шопова, приредувач на книгата и потпретседател на Фондацијата.

Извадоци од делото ќе интерпретира нашиот познат актер, првенец на МНТ,  Никола Ристановски.

Кон промоцијата ќе се приклучат и Националната опера и балет, ФлипБук – Фестивалот на анимирани филмови и ДЛУМ, со сегменти од нивните уметнички продукции во рамките на „2023, Година во чест на Ацо Шопов“.

На страниците на овој „Автопортрет со седум прсти“ се исправа еден друг, речиси непознат Шопов – а сепак истиот! – кој со остро перо пишува за семожните „конфузии“ и „политикантските алузии“ во „нашата мала, нерасповиена литература“, за „литературните и уште повеќе нелитературни конфронтации“, за „стегите на аристократизмот и примитивизмот“, за нашата „провинциска препотентност“ и „особина да импровизираме“, за навиката да „се играме одговорност“ и „напластеното сало на нашето спокојство“… Но и за темните обиди да се покријат со лага страниците од нашата историја, за македонскиот јазик – „трн во окото на големобугарските шовинисти“… Како и за „улогата на поезија во националната афирмација“, за ослободувањето од регионализмот и зачекорувањето кон универзалното во нашата „сериозна и нова литература“, која го носи „здивот на почвата на која се родила и бојата на нејзиното небо“…

Со други зборови, за сè она што и денес нè докоснува, и тоа многу повеќе отколку што нашиот поет можел да поими кога ги објавувал овие свои размисли, во текот на неговите четири децении творечки и општествен живот, од почетокот на четириесеттите до крајот на седумдесеттите години на дваесеттиот век.

Настанот е од отворен карактер. Повелете!

 

Следете нè на:
Facebook
АНТОЛОГ – Книжевен центар

Instagram
antolog_mk

Youtube
https://www.youtube.com/channel/UCPMeZZYy8_NAAGJ4bUR3OeA