ПРОМОЦИЈА НА „КАБИНЕТ НА ЧУДА СО ЅИДОВИ ОД ОГЛЕДАЛА“ – РАЗГОВОРИ НА ВЛАДИМИР ЈАНКОВСКИ СО ВЛАДА УРОШЕВИЌ
Во среда (20 септември) во кафе-книжарницата Буква, со почеток во 19.30 часот, ќе биде промовирана книгата „Кабинет на чуда со ѕидови од огледала; разговори со Влада Урошевиќ“ од Владимир Јанковски. Промоторка на изданието ќе биде писателката и книжевната критичарка Оливера Ќорвезироска, а на промоцијата ќе се обратат и Влада Урошевиќ и Владимир Јанковски.
„Кабинет на чуда со ѕидови од огледала“ е книга во која преку прашањата што Јанковски му ги поставува, Урошевиќ нуди еден вид авторефлексија за сопственото творештво, за некои аспекти од сопствениот живот, за феномените од македонската литература и, воопшто, култура. Исто така, Урошевиќ ги дава своите перспективи за широк спектар културолошки појави, од францускиот надреализам, фантастиката во литературата и сликарството, источните филозофии и култури, односот меѓу книжевната критика, историја и помнењето во литературата, преклопувањата и дијалозите меѓу навидум оддалечените култури, влијанието на имагинарното во секојдневниот живот, значењето на археологијата во обликувањето на свеста за нашата цивилизација итн. Бидејќи ова пред сè е книга за еден живот и за еден животен пат, сите споменати културолошки аспекти на еден посебен начин се „прекршени“ преку личноста и делото на Урошевиќ, преку неговата гледна точка и животен пат.
Според Оливера Ќорвезироска, „Кабинет на чуда со ѕидови од огледала“ претставува „вистинска ’посластица‘, особено за познавачите на творештвото на Урошевиќ. Во неа на единствен начин, барем во домашната книжевност, се поврзани стварноста и фикцијата, животот и книгите на Урошевиќ; таа е засведочена панорама, прелет над македонската книжевност последните повеќе од шест децении, но и еден вид широк, раскошен портрет на Урошевиќ како еден од нашите најзначајни автори“.
„Кабинет на чуда со ѕидови од огледала“ е обид да се направи еден вид дијалошки портрет на Влада Урошевиќ, кој ќе биде составен од различни делови што го обликувале неговиот живот. Како во кубистичките портрети во кои парчињата од ликот се поставени во различни, малку изместени перспективи, но сепак како целина го доловуваат портретираниот, така и во оваа книга од морето аспекти што го сочинуваат животот, од мноштвото аспекти што го сочинуваат животот на Влада Урошевиќ е направен еден од неговите можни портрети. Во тој портрет има и сеќавања од детството и импресии за првите книги, и согледувања за тоа што е патувањето и ставови за почетоците на македонската книжевност, и приватни ситуации со луѓето од неговото непосредно опкружување и мислења за појави од светските култури и цивилизации. Книгата е обид да се долови еден конкретен живот во пресекот и дијалогот меѓу личната егзистенција и пошироките книжевни, уметнички и цивилизациски наслаги што таа егзистенција се обидела да ги осознае и да ги прецеди преку филтерот на своето творештво.
Оливера Ќорвезироска (Куманово, 1965) е писателка и критичарка. Основно и средно образование завршила во родниот град Куманово, а Филолошки факултет во Скопје, каде што живее и работи. Застапена е во дваесетина антологии на современиот македонски расказ, објавени дома и во странство. Нејзините книги се преведени на англиски, француски, унгарски, албански, турски, чешки, српски, словенечки, бугарски, полски и руски јазик. Повеќекратен добитник е на значајни награди за расказ во Македонија, а за „Сплетени раскази“ во 2003 година ја има добиено наградата за најдобра проза на Друштвото на писателите на Македонија „Стале Попов“. Меѓу најзначајните книги на Ќорвезироска спаѓаат: „(С)плетени раскази“, „Аб’т“, „На полпат: (критика или молк), „Престапни години“, „Две перници“, „(Со)шиени раскази“, Кифличката Мирна“, „Мојот брат од тринаесеттиот кат“, „Отвораат ли сништата работа“, „Заклученото тело на Лу“, „Страдањата на младиот лектор“.
Влада Урошевиќ (Скопје, 1934), поет, прозен автор, критичар, есеист, антологичар, преведувач. Поминал значаен дел од животот како професор на Филолошкиот факултет „Блаже Конески“, на Катедрата за општа и компаративна книжевност, држејќи курсеви по историја на европските литератури од XIX и XX век. Објавил единаесет збирки поезија, седум збирки раскази, седум романи, три книги записи и патописи, повеќе книги во кои се собрани критиките и есеите во кои зборува, главно, за македонските писатели. Објавил две книги за фантастиката во литературата, како и две книги за фантастиката во сликарството. Автор на поголем број антологии. Книгите на Влада Урошевиќ се преведени на повеќе јазици: англиски, бугарски, германски, дански, италијански, полски, руски, словенечки, српски, француски, хрватски и шпански. Во 2023 година, по наградите „Роман на годината“ и „Златен венец“ на Струшките вечери на поезијата, прогласен е од Македонската асоцијација на издавачи за „Автор на годината“.
Владимир Јанковски (Скопје, 1977) дипломирал на Катедрата за општа и компаративна книжевност на Филолошкиот факултет „Блаже Конески“ во Скопје. Има објавено седум книги: „Кабинет на чуда со ѕидови од огледала“ (2023), „Скриени желби, немирни патувања“ (2020), „Невидливи љубови“ (2015), „Вечно сегашно време“ (2010), „Лицата на невидливиот град“ (заедно со Иван Блажев, 2010), „Скопје со широко отворени очи“ (заедно со Иван Блажев, 2008) и „Огледало за загатката; разговори за Влада Урошевиќ“ (2003). За романот „Скриени желби, немирни патувања“ ја добил наградата „Роман на годината“ на „Фондацијата Славко Јаневски“, а за „Невидливи љубови“ наградата „Рациново признание“. Активно се занимава со книжевен превод.
Следете нè на:
АНТОЛОГ – Книжевен центар
antolog_mk
Youtube
https://www.youtube.com/channel/UCPMeZZYy8_NAAGJ4bUR3OeA
Контакт Aнтолог
e-mail: marketing@antolog.com
ул. „Ѓорѓи Пулевски“ 29 лок. 1 Скопје
тел. / факс 3201-007
